![18 snem yn shah set patok u doktor ba don kti bad ka kynhun lehnoh ISIS doktor](https://unongsainhima.com/wp-content/uploads/2023/08/doktor-720x417.jpg)
Washington, Nailar:
Uwei u doktor na Pakistan ba shong ba sah United States, u la shah rai set patok haduh 18 snem kynthih haba iadei bad ka jingdon kti ban pynïoh ia ki tiar jingdonkam sha ka kynhun lehnoh ISIS.
Katkum ka jingpynbna na ka Justice Department jong ka United States, la ong ba ia utei u rangbah, la rai ban set patok haduh 216 bnai, kaba la iaryngkat bad ka por ba 18 snem, halor ka jingdon kti jong u ban iatrei lang bad ban ai jingkyrshan ia ka kynhun lehnoh ISIS ha ki por ba la leit.
Ia utei u doktor la ithuh kyrteng kum u Muhammad Masood bad u la don 31 snem ka rta, bad ha katei ka sngi la ong ba u Masood u dang wan poi na Rochester sha Minneapolis-St.Paul International Airport (MSP) ban shong pat da ka liengsuiñ na katei ka Kad Liengsuiñ ban leit sha Los Angeles, kaba don hapoh ka nongbah California. Hynrei ha ka por ba u poi ha MSP, u la shah bat noh ha ki briew ka kynhun Joint Terrorism Task Force jong ka FBI.
La ong ba u Masood, naduh u Kyllalyngkot haduh u Lber jong u snem 2020, u la iadei kam bad katei ka kynhun lehnoh ISIS bad la lap ruh ia ka jingiakren jong u lyngba jong kawei ka App ba la buh kyrpang ban pyndonkam da katei ka kynhun ban ioh iakren bad ki briew ba iadei kam badka. La shem ba u Masood ha katei ka por u dang iakren bad ki nongialam jong katei ka kynhun lehnoh halor ka jingthmu jong u ban leit pyniasoh noh syndon ialade sha katei ka kynhun ‘Islamic State of Iraw & Al-Sham (ISIS). Hadien ba la tohkit bniah ia u, u Masood u la phla ruh ia ka jingthrang jong u ban leit pyniasoh ialade bad katei ka kynhun lehnoh bad kumjuh ruh u la thmu ban leit thombor hi dalade marwei sha United States da ka jingkyrshan jong katei ka kynhun lehnoh ba shyrkhei.