Lahore, Risaw:
U Muhammad Sarwar, uba la kheiñ kum u lehnoh jong ka pyrthei da ka tnat pla pisa jong ka US, ula khlad noh ha Lahore jong ka Pakistan, ha ka Sngi U Blei.
“U President ka Pakistan Markazi Muslim League (PMML) Punjab, U Muhammad Sarwar, u la khlad noh na kane ka pyrthei. U dang don ha lynti na la iing sha ka Mosque ban ai jingduwai, haba u la kyllon bad u la khlad noh,” ong u nongaiktien ka PMML ha ka kyrwoh.
Ia ka daw thikna jong ka jingiap jong u ym pat lah ban batai da ka PMML. Hynrei ka 24NewsHD TV Channel ka iathuh ba u Sarwar u la khlad noh “namar ka jingmynsaw ha ka khlieh hadien ba u la hap na ki step”.
Ka PMML ka dei ka tnat saiñ hima sima jong ka Jamaat-ud-Dawa jong u Hafiz Saeed, uba dei u nongpynmih kam thombor ha Mumbai. U Saeed, u la don ha phatok Kot Lakhpat jong ka Lahore, naduh u snem 2019, ha kiba bun tylli ki mukotduma ai pisa ïa ki lehnoh, ha kaba u la shah rai pynrem la bun bun snem, ong ki heh sorkar.
Ki nongialam ka seng PMML — u Khalid Masood Sindhu, u Saifullah Qasuri, u Hafiz Talha Saeed, u Yaqub Sheikh, u Khalid Naik Gujjar, bad u Muzammil Iqbal Hashmi — ki la pynpaw ïa ka jingsngewkhia halor ka jingduh noh ïa utei u nongialam ka seng jong ki.
“Da ka jingkhlad noh jong u Muhammad Sarwar, ka seng ka la duh noh ïa u nongialam uba khlain bor bad uba khlem tieng”, la ong u Muzammil Iqbal Hashmi.
Ka jingleit ontep ïa u Sarwar, la buh ban pynlong ha ophis treikam jong ka JuD, Jamia Al-Qadsia, ha ka thaiñ Chuburji jong ka Lahore, ha ka miet Sngi U Blei.
Ha u snem 2016, ka tnat pla pisa jong ka US (OFAC) ka la jied ïa u Sarwar bad u Shahid Mahmood, uwei pat u nongïalam ba rangbah jong ka Lashkar-e-Taiba (LeT) kum ki lehnoh ba la jied kyrpang (SDGTs).
Kane ka jingleh ka long ban pynthut ïa ki rukom lum pisa bad jingkyrshan jong ka LeT. Ka OFAC ka la ong ba ïa kine ki arngut la jied ban trei na ka bynta ne na ka bynta katei ka kynhun, da kaba bynrap ba baroh ki mar ki mata bad ki jingmyntoi jong ki ha ki mar ki mata kiba hap hapoh ka jingsynshar jong ka US la khanglad.
“U Sarwar bad u Mahmood jong ka Lashkar-e-Taiba ki don ka jingkitkhlieh ban lum bad ban pynkynriah ïa ka pisa ban kyrshan ïa ki kam jong ka kynhun lehnoh. Kane ka jingleh kam dei tang ban pynpaw pyrthei ïa ki kam, hynrei ka pynthut ruh ïa ka network pisa jong ka Lashkar-e-Taiba bad ka jinglah ban pynlong ïa ki kam thombor ba shyrkhei,” la ong ka OFAC ha ka por ba la buh ïa ki lehnoh.
Katkum ka jingong jong ka OFAC, u Sarwar u dei u heh ophisar jong ka LeT ha Lahore la palat shi snem bad u la bat ïa ki kam nongialam bapher bapher ha kane ka kynhun. U la shakri kum u heh jong ka LeT ha Lahore naduh ym duna ïa ka u bnai Jymmang 2015.
Kum u rangbah jong ka kynhun ha Lahore, u Sarwar u la pynneh ïa ka jingiadei bad ki nongialam ba rangbah jong ka. Hapdeng u snem 2012 bad 2013, u la ïatrei lang bad u heh jong ka tnat kam bar ri jong ka LeT, u Hafiz Abdul Rahman Makki, uba la pan pisa na u, na ka bynta ban siew ïa ka leit ka wan hapoh jong ka Pakistan, ha kaba sdang jong u snem 2013, ong ka OFAC.
