Khliehriat, Nailar 28
U Timing Lyngdoh u la khyrwit da ka hat-trick ha kaba sdang ïa ka lympung ïalehkai Under-16 Boys Football Tournament ba la pynïaid da ka East Jaiñtia Hills District Football Association (EJHDFA) ha madan Artificial Turf, Khliehriat ha ka lah sngi U Blei.
Ha kane ka lympung ïalehkai la wan ïashim bynta da 24 tylli ki kynhun kane District. Ha kane sngi sdang ka Dkhiah West, Diengchynrum Rymbai Wahshnong ki la khur jingjop, katba ka Moopala SC bad ka Chiehruphi SC ki la pynïakhaid ïa ka jingïakhun.
Ha ka jingïakhun kaba nyngkong ka Dkhiah West ka la pynliem da 4-0 kol ïa ka Khliehriat East. Ïa ki kol jong ka Dkhiah West la thep da u Duni Dkhar ha ka minit kaba 3, u Arki Phawa ula thep ar kol bad u Shameki Dkhar (26).
Ha ka jingïakhun kaba bud, ka Diengchynrum ka la jop da 5-0 kol ïa ka ACCFC. U Timing Lyngdoh u la thep lai kol (20, 30 & 47) na ka bynta ban khur syndon ïa ka hat-trick bad ïa ki shikol pat la thep da u Victor Rymbai (55) bad Bretly Lyngdoh (67).
Ha kawei pat ka jingïalehkai kaba la long hapdeng ka Moopala SC bad ka Chiehruphi SC ki la kut ha ka jingïakhaid hadien ba kim shym la lah bn thep kol haduh kaba kut ka jingïalehkai.
Ha ka jingïakhun kaba khatduh jong kane ka sngi, ka Rymbai Wahshnong ka la pynliem da 2-0 kol ïa ka Umlawang SC bad ia kine ki kol la thep da u Elvinstar Swer (39) bad Verdictson Swer (67).
