Shillong, Naitung 16
U David Beckham u la pynpaw ka jingsngewsih kthang hadien ba ka England ka la mad ïa ka jingshah rem da 2-1 kol ha ka Argentina ha ka semi final kaba ar jong ka FIFA World Cup 2026 kaba la long ha ka step jong ka sngi Palei ha Atlanta.
Ha ka jingshisha ka jingkhmih lynti ka England ba kan rung sha ka final sha ka World Cup ha ka sien kaba nyngkong naduh ba ka la rung teng ha u snem 1966, ka la poi sha kaba kut.
Utei u khlur ïalehkai barim ka England u la ai mynsiem halor ka jingïaid lynti kaba pynsah kynmaw ha kane ka lympung. Kane ka jingjop ka la pynlong ïa ka Argentina ban rung sha ka final jong ka World Cup 2026, ha kaba kan ïakynduh pyrshah ïa ka Spain ha ka step jong ka sngi U Blei.
Haba pynpaw ha ka jingthoh jong u ha ka Insta -gram, une u rangïalehkai phutbol barim ka England u la pynpaw ïa ka jingsngewsih halor ka jingshah rem, hynrei u la ïaroh ïa ka kynhun, ki nongkyrshan bad ka ri halor ka jinglah ban pynsah kynmaw ha kane ka lympung.
“Ka jingsngewsih ka long na ka bynta jong ngi baroh, hynrei ki jingkynmaw kiba ai mynsiem bad kiba neh junom. Ka jingkhublei ka long ïa ka kynhun jong ngi, ki nongkyrshan jong ngi & ka ri jong ngi na ka bynta kaei kaba phi la ai ha ngi ha kane ka World Cup,” la bynrap u Beckham.
Ka Argentina kaba la bat ïa ka nam lahduh ha ki saw snem ba la lah, ka la wanphai ba kan pynliem ïa ka England da 2-1 kol ha ka jingïakhun semi phainal.
Ka jingïalehkai jong ka kylla step ka la long kaba ïakhaid bha ha kaba baroh ar ki kynhun ki la pyrshang ban ïakhun tyngeh na ka bynta ban ïoh thep kol, hynrei kim shym la lah ban pynurlong.
Hadien shiphew minit ba la bteng ïa ka kylla miet, ka England ka la ïoh ban pynkhih jar lyngba u Anthony Gordon hadien ka jingïarap pynbuh da u Morgan Rogers.
Watla ka la shah rem, hynrei ki rangïalehkai ka Argentina kim shym la duh mynsiem bad hashwa ban wai ka la lah ban pynïakhaid kylla lyngba u Enzo Fernandez ha ka minit kaba 85 bad ïa kane ka kol la ïarap pynbuh da u Lionel Messi na ka bynta ban ïakhaid mar shi kol.
Ka Argentina ka la lah ban pynurlong syndon ïa ka jingjop hashwa ban wai artad hadien ba u Messi u la ïoh ïa ka kabu kaba biang ban pynbuh bol na ka bynta u Lautaro Martinez (90+2), u bym shym pynlehnohei ïa kane ka kabu ksiar bad ban pynlong syndon ïa ka Argentina ban rung sha ka final.
Te kumta ka England kan ïakynduh pyrshah ïa ka France na ka bynta ban ïaknieh ïa ka kyrdan balai ha ka step jong ka sngi U Blei, katba ka Argentina ïa ka Spain ban ïaknieh ïa ka nam lahduh ha ka sien kaba ar.
