Shillong, Nailar 28
Ka jingïakhun tyngeh u rangïalehkai ba dangkhynnah u Lamine Yamal ka la pynlong ïa ka Barcelona ban wanphai da ka jingjop da 4-3 kol ha ka jingïakhun pyrshah ïa ka Villarreal ha ka lympung La Liga.
Utei u rangïalehkai ba dang 16 snem ka rta u la ïarap ban pynbuh bol na ka bynta u Gavi Paez ban thep ïa ka kol kaba nyngkong na ka bynta ka Barcelona bad ula ïarap pynbuh bol ruh na ka bynta ka kol jong u Robert Lewandowski bad ban pynlong ïa ka Barcelona ban khur ïa ka jingjop.
“U Lamine u la lah ban ïalehkai bha ha kane ka jingïakhun,” la ong u coach ka kynhun u Xavi Hernandez. “U la ïarap shibun eh ïa ngi, ban pynurlong ïa ki kabu ksiar bad ban ïarap ban pynbuh ar sien. Ha kaba nyngkong nga la sngewtieng ban pynïalehkai ïa u, hynrei ngi ai ka jingshaniah ha ki rangïalehkai kiba dangkhynnah bad ruh ban shaniah tylli ha kiba dangsan napoh ka shlem ai jinghikai.”
Hadien ba u la shah phaikhmat ha u Xavi ha ka por ba u dangïalehkai ha ka por ba u dangïalehkai na kane ka klob (youth), u Yamal u la long u rangïalehkai ba dangkhynnah ban ïalehkai na ka bynta ka Barcelona ha u Ïaïong ha ka por ba u dang 15 snem, 9 bnai, 16 sngi. Ha ka taiew ba la lah, u long uba dangkhynnah ban sdang na ka bynta ka Barcelona bad ban khur jingjop ïa ka Cadiz.
“Watla nga danglong uba dangkhynnah, hynrei ngam shym la don kano kano ka jingsngewtieng haba nga mih sha madan ban ïalehkai namar kane ka dei ka jingialehkai kaba dangsngewtynnad eh,” la ong u Yamal hadien ba u la lah ban ïalehkai bha pyrshah ïa ka Villarreal. “Nga pyrshang ban pynurlong ïa ki kabu ksiar kumba u coach u la hikai ïa nga.”
Hadien katei ka kol kaba nyngkong, u Yamal u la ïadon bynta ban ïarap pynbuh bol na ka bynta u Frenkie de Jong, u bym shym pynlehnohei ïa kane ka kabu ksiar ha ka minit kaba 15.
Hashwa ban kut ka kylla step, ka Villarrreal ka la ïoh ban pynphai kylla lyngba u Juan Foyth, uba la thep da ka khlieh ha ka corner ba la shut da u Alex Baena ha ka minit kaba 26. U Alexander Sorloth u la thep ïa ka kol kaba ar ha ka minit ba 40 bad ïa ka kol kaba lai la thep da u Alex Baena ha ka minit ba 50 na ka bynta ban tam da 3-2. Hashwa ban kut ka jingïalehkai, ka Barcelona ka la lah ban pynphai kylla ar kol lyngba u Ferran Torres ha ka minit kaba 68 bad kawei pat da u Lewandowski ha ka minit ba 71 na ka bynta ban khur syndon ïa ka jingjop.
Lyngba kane ka jingjop, ka Barcelona ka dangduna sa 2 point ïa ka Real Madrid, kaba la bat ïa ka kyrdan ba hakhlieh jong kane ka lympung.
