Karachi, Nailar:
Ha kane ka jingjia, la ong ba uwei u nongñiah taksi u la shah thombor bad shah pyniap ha ki nonglute bym lah ban ithuh hapoh Karachi ha ka Sngi Saitjaiñ.
Ia utei u nongñiah taksi la ithuh kum u Mumtaz. Katei ka jia ryng-khat ruh katba u dang kit ia ki nongleit nongwan na ka Kad Liengsuiñ Jinnah International Airport ban leit sha New Karachi.
Hynrei, hapdeng shiteng lynti, kynsan kitei ki kynhun runar ki la wan mih bad khang lynti ban pynsangeh ia katei ka kali ha ka thaiñ kaba hap hapoh ka jingkhmih jong ka BIlal Colony Police Station. La ong ba dei ha ka por ba utei u nongñiah u pyrshang ban iakhun pyrshah ia kitei ki nonglute, uwei na katei ka kynhun u la sei ia ka suloi bad siatiap ia u hajuh.
Ki pulit ki dang ioh kurup tang ia katei ka kali ba u Mumtaz u ñiah ha katei ka sngi bad ki la iathuh ruh ba kin dang hap ban wad bniah bad bud dien bha shwa khnang ban lap ia ka jingshisha bad ia kiba don kti baroh haba iadei bad katei ka jingjia.
Katkum ka jingtip jong ki pulit, u Mumtaz u dei u nongshong shnong jong ka Nathia Gali bad u sah marwei hapoh Greentown. Ki bahaiing- hasem jong u Mumtaz, ki iathuh ba u Riyaz, uba long u hynmen jong u Mumtaz ruh u la shah siat iap ha ki kynhun runar ha ki 8 snem ba la leit.
Haba iadei bad kane ka jingjia, kumjuh ruh ha ki khyndiat taiew ba la leit jong une hi u Nailar, la don ki katto katne ki kynhun runar bym don jingithuh kiba la siat iap ia uwei u samla hapdeng ka jingleit lute jongki ha ka thaiñ North Bypass hapoh katei hi ka nongbah Karachi. Kumjuh ha kane ruh ka jingjia, la ong ba utei uba shah siat uba la ithuh kum u Ibrahim, u don hapoh ka kali ba u ñiah, ha kaba u la shah bat ha kitei ki kynhun runar ha shiteng lynti bad u la shah siat iap noh hapdeng ka jingpyrshang jong u ban iakhun bad kitei ki runar.
Shuh shuh ruh ha kawei pat ka jingjia kaba la jia ha une hi u Nailar, uwei u pulit u la shah siat iap ha ki runar bym don jingithuh hapoh Allahdad Ground hajan Sharafi Goth hapoh ka distrik Karachi jong ka Pakistan hi.
Lada peit thuh bha, la iohi ba ka Pakistan ka la sdang ban ioh mad ia shibun ki jingjia bad ki kam thombor jong ki kynhun runar ha kine ki sngi bad kane ka ju kham jia bha khah- khah hapoh ki thaiñ jong ka Khyber Pakhtunkhwa bad ha Balochistan.
Katkum ka kaiphod ba la ioh lum tat haduh u Naitung jong une u snem 2023, la ong ba ki kam thombor bad ki jingpyniap ki la jur bha hapoh Pakistan ha une u snem.
