Guwahati, Nailar:
Ka jingshlei um ha ka jylla Assam ka la nang jur ha ka Lah Sngi U Blei ha kaba ki la don palat 1.90 lak ngut ki briew kiba la shah ktah bad sa uwei u briew u la ïap, la ïathuh ka tyllong khubor ba la wan na ki heh ba dei khmih.
U slap uba jur u la hap ha ki bynta ba shaneng ha kaba kane ka la nang bteng shuh shuh ka jingwan tuid jong ka um na kiba bun ki wah ha kaba ka la tuid haduh u dak uba ap jingma ha kiba bun ki bynta jong ka jylla, la ong ka tyllong khubor.
Ïa ka jingtreikam jong ki jhad bad ki lieng ha ka wah Brahmaputra la pynsangeh shwa ha Guwahati, bad ha Nematighat kaba don ha Jorhat namar ka jingkiew palat jong ka um.
Ka Assam State Disaster Management Authority (ASDMA) ka la ïathuh ba uwei u briew u la ïap ha Demow kaba don ha Sivasagar distrik, ha kaba da kane baroh kiba la ïap na kiba bun ki daw jong ka jinghap jong u slap uba jur ha une u snem ka la kiew sha ka 15 ngut haduh ba la ïohlum ïa ka khubor.
Ki la don baroh kumba 17 tylli ki distrik ïa kiba haduh mynta ki dang ngat hapdeng ka jingshlei um, ha kaba kane ka la ktah jur ïa ki 1,90,675 ngut ki briew, la ïathuh ka tyllong khubor.
Ka jaka kaba la shah ktah jur eh na ka jingshlei um ka dei ka Lakhimpur distrik ha kaba ki la don kumba 47,338 ngut ki briew kiba la ngat ha ka apot, ha kaba la bud da ka Dhemaji da 40,997 ngut.
Ki la don baroh kumba 427 ngut ki briew ki bym don ïing shuh bad kine ki la hap ban sah ha ki ar tylli ki jaka sah ba shipor ba la pynbiang na ka bynta jong ki, ki la don baroh kumba 45 tylli ki jaka sam ïa ki jingdonkam sha ki lanot shlei um ïa kiba la pyntreikam haduh mynta.
