Dehradun, Nailar:
Ïa ki jingorpait bad ki jingtor ha Joshimath ka jaka kaba la shah ktah jur na ka jingngam jong ka khyndew yn sa khmih bniah da ki stad saïan na Central Building Research Institute, la ong u heh ba dei khmih jong ka Chamoli distrik. Ha u Kyllalyngkot jong une u snem ba mynta, ka jingngam jong ka khyndew ka la ktah shibun ïa ka Joshimath ha kaba kane ka la pynlong ïa baroh ba kin phai khmat sha ka. Ki jingtor bad ki jingorpait ki la jia ha kiba bun tylli ki ïing bad bun ngut ki briew ki la hap ban kynriah jaka noh kum shi bynta ban ïada ïa ka jingim ka jong ki.
U Chamoli DM Himanshu Khurana u la pynlong ïa ka jingïalang bad ki heh ba dei khmih jong kiba bun ki tnat ha Joshimath na ka bynta ban ïamir jingmut na ka bynta ban shim ïa ki sienjam ha ka bynta ban shna bad maramot ïa kiba bun ki bynta kiba la tor bad julor ha katei ka thaiñ.
U la hukum ïa ki ba ki la dei ban ïatreilang bad ki stad saïan jong ka CBRI bad ban ïatreilang na ka bynta ban khmih bniah ha kaba ïadei bad ka jingdon jong ki jingtor bad ki jingorpait ha Joshimath. U la bthah ruh ïa ki heh ba dei khmih ba ki la dei ban pynkhreh ha kaba ïadei bad ka kaiphot kaba bniah ha ryngkat ka jingïatreilang bad ki stad saïan jong ka CBRI na ka bynta ban shna pynbha biang ïa ki ïing kiba la shah ktah jur na ka jingngam jong ka khyndew.
