U Nongsaiñ Hima,1983
Ka long kaba donka, eh ba ki kmie ki kpa kin sharai ïa la ki khun bad kane ka long ka jingïarap bad jingïaai kti bakongsan tam ha ka kam kaba khraw ban ïalam ia u khynnah ha ka thma jong ka jingim jong u.
Ka jingkitkhlieh jong ki kmie ki kpa ïa la ki khun kam mut tang ba la phah ïa la ki khun sha skul ba ka kamram ki kmie ki kpa ka la dep bad dei u nonghikai uba la dei ban leh lut ha ka jingialam shaphrang ïa ki khun jong ki. Ki khynnah ki don ha skul tang kumba 6 kynta bad 18 kynta ki don hapoh ki thapniang bad hapoh u tnum jong ka ïing ka sem jong ki. Dei ki kmie ki kpa kiba la pun, kiba la kha ïa ki bad kiba tip bha ïa la ki khun haei ki duna bad haei ki tam, haei ka akor haei ka jinglehkhuid bad haei ka jingpule bad kumno ka leit ka wan jong ki.
Bun ki ban ong ba bun na ki kmie ki kpa mynta ha kine ki por kim banse ban ïa kmaia lang namar ba la rem eh ka bam ka dih bad kiei kiei baroh. Kumta ïa ki khun la shu dei ban iehnoh ïa ki khlem da don ba pynbeit lem ïa ki. Kumta ki khun ki la dei ban ïa im ïa long hi baroh shisngi lait tang khyndiat kynta mynstep mynmiet ba ki ïakynduh ïa la ki kmie ki kpa. ïa kane ka jingeh ka long kaba lah ban sngewthuh bad ym dei tang hangne ha ka ri jong ngi kiba shem ïa kine ki jingeh hynrei ha ka pyrthei satlah baroh. Ha kiwei ki jaka ki don ki jingwad lad kumno ba pynjem ïa kine ki jingeh. Don ki jaka ha kaba ïa ki khynnah ynda la lait na skul la leit buh bad ynda lait ki kmie ki kpa na la ki kam ki sa leit shim ïa ki nangta.
Don pat kiba na la ka kam ka jam ne ka shong ïew shonghat ki pyllait por khnang ban leit peitïa la ki khun sha iing ynda haba ki la lait na skul. Hynrei ban shu ieh ïa la ki khun kumto kam long kaba dei eh bad la dei ban don ki nongpeit nongjngoh kiba lah ban shaniah namar lada ngim khein kor ïa kine ki khynnah kiba long ka spah bakordor jong ka jaidbynriew bad jong ka ïing ka sem, ka lawei ka long kaba jngut bad bym don jingkyrmen.
Kumta lah ban ong ba ka skul kaba bha bad banyngkong tam dei ka ïing ka sem kaba long ka jingbuh U Blei ban hikai skul ïa kiba dang rit bad ka iing ka long kumba ka kmie u kpa ki kwah ba kata ka ïing kan long.
Kane ka long ka jingshisha kaba ym lah ban len. Dei ha iing shwa ba u khynnah u hikai kumno ka kmie ka peit ïa u, ka jingkohnguh khlieh jong u kpa ne ka jingpyni dak jong u ba um sngewbha, ki ktien ieid jong u kpa ne ka jingpyni dak jong u ba um sngew-bha, ki ktien ieid jong ka para ne hynmen, ka jingïaishah jong u hynmen ne para, ka jingud u ngap ne ka jingïaid kai ha ki lynti khalw, ka jingkren da ki sur bathiang, ka jingsngewnguh ïa ki kam myntoi ba la ioh bad ba khlem ioh bad ka jingsngewnguh ïa U Trai Nongthaw.
Kumta ka ïing ka sem ka long ka shlem bah ïa u khynnah bad ka long ruh ka skul bah ia u khynnah ha kaba u hikai bad bud nuksa, dei ha kane ka ryta ba ka jingmut jingpyrkhat jong u ka long kaba lah ban shim dur kloi bad wei ba ka la shim dur shisien, ka sah sah.
Namarkata ka dei ka kamram kaba khraw bad ba kyntang jong ki kmie ban sharai ïa la ki khun.
