Shillong, Nailar 30
Ka Shillong College bad ka St. Anthony’s College ki la jam sha ka final ha ka lympung ïalehkai Inter College Football Men Tournament ba la pynïaid da ka skulbah NEHU.
Kine ar tylli ki kynhun kin pynkhreh ban ïaknieh ïa ka nam lahduh ha ka jingïakhun final ka ban long ha ka sngi Palei ha ka por 10 baje mynstep ha SAI Training Centre, NEHU.
Haba phai sha ki ar tylli ki jingïakhun semi final kiba la long ha ka sngi Balang, ka St. Anthony’s ka la pynliem noh ïa ka Seng Khasi College, Shillong da 3-1 kol bad ka Shillong College ka la jop da 6-1 kol ïa ka Edmund’s College.
Ha kane ka sngi la ïadon lang u MLA ka Mawlai Constituency u Bah Brightstarwell Marbaniang.
