Mysuru, Nailar:
Ka Karnataka ka la sdang ban pyllait ïa ka um na ki jaka ba den sha Tamil Nadu kum shi bynta ban pynurlong halor ka hukum ba la phah da ka Cauvery Water Management Authority (CWMA), la ïathuh ki heh ba dei khmih.
Ka CWMA ka la hukum ïa ka sorkar Karnataka ba kan pyntikna ha ka ban phah da kumba 5,000 cusecs (cubic feet per second) ka um ha kaba la hap ban pynpoi sha Biligundlu kaba don ha Tamil Nadu man ka sngi ha ka taïew ban wan haduh ka 12 tarik, Nailur.
Ka Karnataka shwa kane ka la shah bthah ba la dei ban pyllait ïa ka um da kumba 10,000 cusecs hynrei ka jylla ka la phah ïa ka jingkyrpad ha kaba ka la ong ba kam lah ban leh kumta namar ka jingduna slap ha ki jaka pyllang um jong ka Cauvery. Kum shi bynta ban pyrkhat halor ka jingsngewkhia jong ka Karnataka, ka CWMA ka la hukum ba la dei ban pyllait noh tang 5,000 cusecs ka um.
Ïa ka um la pyllait na na Krishna Raja Sagar (KRS) Dam bad Kabini Reservoir ha Mysuru, la ïathuh ka tyllong khubor ha ka sngi Balang. Kiba bun na ki seng jong ki nongrep ki la pynlong ïa ka jingïakhih pyrshah halor ka jingpyllait um na KRS Dam bad na Kabini Reservoir. Ka jingïakhih baroh shimet jong ki nongrep ka la long ha Mandya bad Srirangapatna harud jong ka wah Cauvery.
