Shillong, Nailur 05
U coach ka kynhun ïalehkai ka Spain kaba la rah ïa ka Women’s World Cup, u Jorge Vilda u la shah weng noh ha ka Royal Spanish Football Federation (RFEF).
Kane ka la wan hadien ba ka RFEF ka la pan map ïa baroh ki paidbah halor ki kam jaboh ba leh da u President u Luis Rubiales hadien ba ka kynhun ki ‘thei ïalehkai ka la khur ïa ka nam lahduh ha ka World Cup.
Kane ka rai ka la long hadien 16 sngi ba u Vilda u la lah ban pynurlong ïa ka Spain ban khur ïa katei nam lahduh ha ka World Cup ha u bnai ba la dep hadien ba katei ka kynhun ka la lah ban pynliem ïa ka England da 1-0 kol ha ka final. Kham hashwa ha u snem ba la lah, ka kynhun ki ‘thei ïalehkai ka la dawa ban weng noh ïa u na katei ka kam ba u bat.
Ki la don haduh 15 ngut ki ‘thei ïalehkai kiba la byrngem ban ym ïalehkai na ka bynta ka kynhun tad haduh ba un da mih noh. Hynrei ka RFEF ka la ïeng ban ïada ïa u Vilda, uba la ïoh jingkyrshan na u president u Luis Rubiales. Utei u president u la ailad ïa u Vilda na ka bynta ka kontrak kaba thymmai hadien ba ka Spain ka la rah ïa ka World Cup.
Hynrei ïa katei ka kam jong u president la shimti ba tuklar da ka FIFA da kaba la rai ban sospon ïa u na baroh ki lympung ïalehkai phutbol haduh 90 sngi hadien ba u la doh ïa ka kapten ka kynhun ka Jenni Hermoso hadien ba la kut ka jingïakhun final.
Ha ka jingïalang ba ki nongthoh khubor, na ka liang u Rubiales u la kyntait ban ïehnoh kam, hynrei ka rai sospon jong ka FIFA ka long ba u lah ban shah weng shipor kum u khlieh ka RFEF bad u Pedro Rocha un shimti shipor kum u khlieh duh katei ka synjuk.
Kat kum ki khubor, la ong ba u Rocha u la don ka jingthmu ban wanrah ka jingkylla hapoh ka kynhun ki ‘thei ïalehkai bad kaba kongsan eh ka long ban weng noh ïa u Vilda kum u coach. Ïa kane ka rai la shim ha ka jingïalang kaba la long ha ka sngi Ba-ar hapdeng u Rocha bad u Myntri ka tnat ïalehkai u Victor Francos.
U Rocha u la don ka jingthmu kaba kyrkieh ban wanrah ka jingkylla ha ka kynhun ki ‘thei ïalehkai ka Spain hashwa ban sdang ka UEFA Nations League ka ban ïakhun pyrshah ïa ka Sweden ha ka 22 tarik mynta u bnai. Ki la don haduh 88 ngut ki ‘thei ïalehkai ka Spain kiba la byrngem ban ym ïalehkai na ka bynta ka Spain tad haduh ban da weng noh ïa u Rubiales na katei ka kam kaba u bat.
