Shillong, Nailur 06
Ka Meghalaya Cricket Association ka la sdang ïa ka lympung ïalehkai U-19 Girls Inter District Cricket Tournament.
Ïa kane ka lympung la pynlong ha ki ar tylli ki jaka kata ha Umbuda kaba ha Ri-Bhoi bad ha Salpara kaba ha North Garo Hills bad ki la don 10 tylli ki synjuk kiba la pynïasoh sha ka MCA ban ïashim bynta ha kane ka lympung.
Ha ka Zone 1 (Group -A), ka Ri-Bhoi District Cricket Association ka la pynliem noh ïa ka South West Khasi Hills DCA da 8 wiket. Ha ka Zone 2 ki don tang kawei ka group ha kaba ka North Garo Hills DCA ka la jop da 73 run ïa ka East Garo Hills DCA.
Ha ka jingïalehkai kaba nyngkong, ka Ri-Bhoi ka la jop ïa ka kynting pisa ha kaba ka la kamai 125 run bad shah pynkhyllem 4 wiket. Lyngba ka jinghap slap la hap ban pynkylla ïa ka thong sha ki 94 run ban jop na ki 15 over, ha kaba ka Ri-Bhoi ka dangsah salai bol ban pyndep.
Ka Indariakor K. Wanñiang ka la tied 48 run na ki 49 bol, kynthup ïa khyndai tylli ki ‘four’na ka bynta ka SWKH. Ïa ka wiket la lah ban pynhap da ka Bimla Thakuri (2/40), katba ka Anjelica Maring (1/8) bad ka Doilna Martin (1/37) ki la lah ban khur ïa kiwei pat ki ar wiket. Ka Ankita Sharma ka la long ka nongtied kaba khlem shah pynhap wiket ha kaba ka la tied 37 run na ki 53 bol ha kaba ka Ri-Bhoi ka la jop da 8 wiket.
Ha kawei pat ka jingïakhun ka bym shah pynthud ha u slap, ka NGH ka la kamai 148 run bad shah pynhap 8 wiket ha ki 35 over, hynrei ka EGH ka la shah pynkhyllem baroh ki nongtied bad kamai 75 run bad ka Julitha Sangma ka la lah ban khur 7 wiket.
Ka jingïalehkai ha ka sngi Palei kan long hapdeng ka West Khasi Hills DCA pyrshah ïa ka Shillong Cricket Asso-ciation ha ka Zone 1 (Group-B), katba ka South Garo Hills DCA ïa ka Tura DCA ha ka Zone 2.
