Jowai, Nailur 07
U Chanmitre Dkhar u la khyrwit saw kol bad pynlong ïa ka Lion SC ba khur ïa ka jingjop bad rung syndon sha ka quarter final jong ka lympung ïalehkai 2nd Division Football League (6th Debo Shullai Memorial Trophy) ba la pynïaid da ka West Jaiñtia District Sports Association (WJDSA).
Kane ka wan hadien ba ka Lion SC ka la pynliem ïa ka NSA da 4-0 kol ha Kiang Nangbah Stadium Ladthadlaboh, Jowai ha ka sngi Palei. U Chanmitre Dkhar ula thep ïa kitei ki saw tylli ki kol ha ka minit kaba 22, 25, 28 & 74.
Nalor ka Lion SC, kiwei de ki kynhun ïalehkai kiba la rung sha ka quarter final ki long ka Mooknor Thadmuthlong, Maitchaphrang Mootyrchiah bad ka Khliehmynkrem.
Ha ka sngi Thohdieng ka jingïakhun kan long hapdeng ka Panaliar pyrshah ïa ka Shangpung Khlieh-muchut ha ka por 12 baje mynsngi.
Haba phai sha ka lympung ïalehkai (L) Kesiloy Pala Invitation Football Tournament 2023, ka CSA United ka la pynliem noh ïa ka Wahiajer FC da 4-2 kol lyngba ka tie-breaker hadien ba ka por ba la buh ki la ïakhaid mar 1-1 kol.
Ïa ka kol jong ka CSA United la thep da u Hanson Pdang ha ka minit kaba 58, katba ka kol jong ka Wahiajer FC la thep da u Augustine Mukhim (54).
