Shillong, Nailur 07
Ka kynhun ki ‘thei ïalehkai ka Jylla ka la jam sha ka semi final ha ka lympung ïalehkai Hero Sub Junior Girls’ National Football Championship 2023-24 (Tier 1), hadien ba ka lah pynliem sa ïa ka Chhattisgarh da 3-2 kol ha ka Sngi Palei ha Amritsar, Punjab.
Kane ka nam jop ka la wan urlong lyngba ka Wanrihun Kharnaior, Bonifilia Shullai bad ka Larihun Songthiang.
Kane ka kynhun hapoh ka jingïalam ka Kong Ïaikyntiew Nong-kynrih (coach) ka la long kaba khlem shah rem na ki lai sien ïakhun jong ka Group-C ha kaba ka la bat ïa ka kyrdan ba hakhlieh da kaba kamai 9 point. Kane ka kynhun ka la jop ïa ka Gujarat (2-0), Assam (3-1) bad ïa ka Chhattisgarh (3-2).
Haba phai sha kane ka jingïakhun ba khatduh, ki ‘thei ïalehkai ka Meghalaya ki la ïakhun tyngeh naduh kaba sdang, hynrei hadien shiteng kynta ba ka la ïoh ban pynkhih jar nyngkong eh lyngba ka Wanrihun ha ka minit kaba 34. Hashwa ban kut ka jingïalehkai jong ka kylla step ka Meghalaya ka la pynbud biang ïa ka kol kaba ar lyngba ka Bonifilia ha ka minit kaba 45+2 na ka bynta ban tam da 2-0 kol.
Hadien katto katne por ba la bteng ïa ka jingïakhun jong ka kylla miet ba ka Chhattisgarh ka la lah ban pynphai kylla shi kol lyngba ka Naveena Mourya ha ka minit kaba 52. Kane ka kynhun ka la thep biang ïa ka kol kaba ar lyngba ka Amritha Baghel ha ka minit kaba 77 na ka bynta ban ïakhaid mar 2-2 kol.
Hashwa ban wai ka Meghalaya ka la thep biang ïa ka kol kaba lai bad kaba khatduh lyngba ka Larihun Songthiang ha ka minit kaba 86 na ka bynta ban khur syndon ïa ka jingjop.
