Shillong, Nailur 07
Ka kynhun ki rangïalehkai ka Jylla ka la wanphai da ka jingjop ha ka lympung ïalehkai Sub-Junior Boys National Football Cham-pionships, hadien ba ka lah ban pynliem ïa ka Karnataka da 4-1 kol ha ka sngi Palei ha Malda kaba ha West Bengal.
Wat la ka Meghalaya ka la shah rem ha ka Utter Pradesh haduh 5-1 kol ha ka jingïalehkai kaba nyngkong jong ka Group-A, hynrei ha kane ka jingïakhun kaba ar ka la lah ban ïalehkai bha.
Haba phai sha kane jingïalehkai, ka Karna-taka ka la ïoh ban pynkhih jar nyngkong eh lyngba u Arvin Palatt Chirakkara ha ka minit kaba nyngkong, hynrei tang ha ka minit kaba 25 ka Meghalaya hapoh ka jingïalam u Aibanjop Shadap (Coach) ka la lah ban pynphai kylla lyngba u Prosperwell Ryntong, uba la ïoh ïa ka nam Man of the Match.
Ka Meghalaya ka la pynbud biang ïa ka kol kaba ar ha ka minit kaba 40 lyngba u Prosperwell Ryntong. Hadien ar minit ka la thep biang ïa ka kol kaba lai lyngba u Robindor Kyrsian.
Hadien katto katne por ka Meghalaya ka la thep biang ïa ka kol kaba saw lyngba u Baniar Kharsahnoh ha ka minit kaba 77. Hadien shi minit ka Karnataka ka la lah ban pynphai kylla ia ka kol kaba ar jong ka lyngba u Lakshith B.J hashwa ba kan mad syndon ïa ka jingshah rem.
