Shillong, Nailur 08
Ka kynhun ïalehkai ka ri India ka la pynjem khnap da kaba thep haduh 8-0 kol ïa ka Maldives na ka bynta ban jam sha ka final ha ka SAFF U-16 Championship kaba la long ha ka sngi Thohdieng ha Changlimithang Stadium kaba ha Thimphu, Bhutan.
Ha kane ka jingïakhun semi final, u Mohammad Arbash bad u Aiborlang Kharthangmaw ki la ïoh ban thep mar ar kol. Katba u Vishal Yadav, Mohammed Kaif, Levis Zangminlun bad u Manbhakupar Malngiang ki la thep mar shi kol.
Kumba ka paw na kane ka jingïakhun, ka India ka la thep ar kol ha ka kylla step bad ka la pynbud haduh shiteng dorjon ha ka kylla miet na ka bynta ban khur syndon ïa ka jingjop.
Naduh kaba sdang ka India ka la lah ban ïalehkai bha ha kaba ka la ïoh ban thep kol nyngkong lyngba u Vishal Yadav ha ka minit kaba 22 bad hadien shiteng kynta ka la pynbud biang ïa ka kol ba ar lyngba u Mohammed Kaif (36).
Hadien ba la bteng biang ïa ka jingïakhun jong ka kylla miet, ka India ka la ïoh thep biang ïa ka kol ba lai lyngba u Levis Zangminlun (53). U Aiborlang Kharthangmaw u la ioh ban thep ar kol ha ka minit kaba 62 & 82.
Hashwa ban wai ka India ka la thep biang ïa ka kol kaba san lyngba u Manbhakupar Malngiang (70). Ïa kiwei pat ki la ar kol la thep da u Mohammad Arbash ha ka minit kaba 77 & 84 na ka bynta ban khur syndon ïa ka jingjop.
Lyngba kane ka jingjop ka India kan ïakhun pyrshah ïa kawei na ki kynhun ka ban khur jingjop ha kawei pat ka semi final kaba ar hapdeng ka Pakistan bad ka Bangladesh, ha ka final ka ban long ha ka sngi U Blei ha ka por 5.30 janmiet.
