Khliehriat, Nailur 14
Ka Moosianglamare old SWO bad ka Moosiang -lamare New ki la kiew kyrdan sha ka Second Division hadien ka jinglah ban ïalehkai bha ha kane ka aïom jong ka 3rd Division Football Tournament ba la pynïaid da ka East Jaiñtia Hills District Football Associa-tion (EJHDFA).
Ïa kane jingkiew kyrdan la pynskhem hadien ba ki la khur jingjop ha ka jingïakhun quarter final kaba la long ha madan Artificial Turf kaba don ha Diengshynrum, Khliehriat ha ka sngi Palei.
Haba phai sha ka jingïakhun ka Moosiang-lamare old SWO ka la pynliem da 2-0 kol ïa ka Tubershohshrieh SC bad ïa kine ki kol la thep da u Meshwa Lapasam ha ka minit kaba 61 & 76.
Ha ka jingïakhun kaba bud, ka Moosianglamare New ka la pynliem ïa ka Lakadong Ummat SC da 5-4 kol kaba la wan lyngba ka jingïashut tie-breaker hadien ba ka por ïakhun ka la kut da ka jingïakhaid da mar 1-1 kol.
Ïa ka kol jong ka Moosianglamare New la thep da u Firsterjoy Pariat ha ka minit 26, katba ïa ka kol jong ka Lakadong Ummat la thep da u Edifirst Chadong ha ka minit kaba 71 kaba wan lyngba ka penalty.
Lyngba kine ki nam jop ka Moosianglamare old SWO bad ka Moo-sianglamare New ki la rung syndon sha ka semi final.
