Shillong, Nailur 14
Ka kynhun ki ‘thei ïalehkai jong ka Saiden Secondary School ka la long ba la pynkhreh ban ïashim bynta ha ka U-17 (girls) jong ka 62nd Subroto Cup Football Tournament 2023 ka ban long ha nongbah Delhi naduh 19 haduh 26 tarik mynta u bnai.
Kane ka kynhun kaba na Nongpoh, Ribhoi District, ka la don ha ka Pool-G ha kaba kan ïakhun pyrshah ïa ka Goa, Uttarakhand bad ka Kendriya Vidyalaya Sangathan. Ka jingïakhun kaba nyngkong kan dei ha ka 20 tarik pyrshah ïa ka Goa.
Kumta kane ka kynhun hapoh ka jingïalam da u Bah Sumarlang Swer kum u Coach bad ka Kong Rida Lyndem kum ka Manager, kan mih na kane ka Jylla ha ka sngi Saitjaiñ ban leit sha Delhi.
Na ka tnat ïalehkai jong ka Sorkar Jylla ka la pynlong ka jingïalang ban ai ka jingkitbok kitrwiang ïa katei ka kynhun ha ka sngi Palei ha madan ïalehkai jong ka MFA kaba ha Polo.
Ha kane ka jingïalang kaba lyngkot la ïadon lang ka Director katei ka tnat, ka Kong Isawanda Laloo (IAS) kum ka kongsan ha ryngkat ka jingïadon lang u Bah P.B. War Nongbri, Assistant Director katei ka tnat, u District Sports Officer ka Ribhoi u Bah Bobby L. Nongbet, u Headmaster ka Saiden Secondary School Nongpoh, ki nonghikai bad kiwei.
Ha kane ka sngi la ai ki kyntien kitbok bad ki jingsneng jingkraw lyngba u Bah K. Passah, Assistant Director, Bah B. L. Nongbet bad ka Kong Isawanda ba kin ïalehkai bha khnang ba ki lah ban wanphai sha la ïing ryngkat ka jingjop.
Ka kyrteng jong ki 16 ngut ki ‘thei ïalehkai ki long ka Daphishisha Syngkli, Ellen Kynta, Imaia Shylla, Kynjailin Sohtun, Juliana Syiemlieh, Alisha Lyngdoh, Inri- La- I- Dor Kongthaw, Batiplang Khapiah, Eiladki Ksoo, Yulity T. Phanrang, Danisha Lyngdoh, Shimtilang Thongni, Nibari Maring, Barikor Kurbah, Daiamon Makhroh bad ka Unity Maring.
Kum ban shu pynkynmaw ha ka State Level Subroto Cup kaba la long dangshen ha kane ka nongbah, ka Saiden ka la lah ban pynliem ïa ka Ïewrynghep Secondary School (EKH) lyngba ka tie-breker da 4-2 kol hadien ba kim shym la lah ban thep kol ha ka jingïakhun final.
