Shillong, Nailur 14
Ka Lamlynti (Madanlyngkhi) FC ka la pynliem noh ïa ka Pynthorbah SC da 4-0 kol na ka bynta ban khur ïa ka jingjop ha ka lympung ïalehkai SSA U-20 4th Division Football League 2023 ha ka sngi Palei.
Ha kane ka jingïakhun kaba la long ha madan Third Ground, ki ‘rangïalehkai ka Lamlynti ki la lah ban ïakhun tyngeh naduh kaba sdang ha kaba u Batskhem Thongnirit u la ïoh ban pynkhih jar ha ka minit kaba 4.
Kane ka kynhun ka la ïoh ban thep kol biang ha ka kylla miet lyngba u Deibor Tongper ha ka minit kaba 46. U Batskhem u la thep biang ïa ka kol kaba ar ka jong u ha ka mint kaba 50 bad ïa ka kol kaba khatduh la thep da u Ricky Mawlong ha ka minit kaba 59 na ka bynta ban khur syndon ïa ka jingjop.
Haba phai sha kawei pat ka jingïakhun kaba ar, ka Mawpdang SC ka la pynliem noh ïa ka Riatsamthiah SC da 2-1 kol.
Watla ka jingïakhun ka la long kaba ïakhaid bha, hynrei hadien shiteng kynta ka Mawpdang ka la ïoh ban pynkhih jar nyngkong lyngba u Wellborn Syiem ha ka mint kaba 35.
Hadien katto katne por ka Riatsamthiah ka la lah ban pynïakhaid kylla lyngba u Banjop Thabah ha ka minit kaba 45. Ka Mawpdang ka la thep ïa ka kol kaba ar lyngba u Patsha Syiem ha ka minit kaba 64 na ka bynta ban khur syndon ïa ka jingjop.
Kane k lympung kan bteng biang ha ka sngi Thohdieng ha kaba ka Risa Colony SC kan ïakhun pyrshah ïa ka Mawlyngngad SC ha ka por 3:15, katba ka Diengpasoh SC ïa ka Mawkriah West SC ha ka por 4:45 janmiet.
