Shillong, Nailur 14
U kapten ka India u Sunil Chhetri un ïalam ïa ka kynhun ïalehkai sha ka Asian Games ha kaba u ‘rangïalehkai shapdeng ka Jylla u Samuel James Lyngdoh Kynshi u la paw hapoh ka thup kyrteng jong 18 ngut ki ‘rangïalehkai na ka bynta katei ka lympung ka ban long ha China.
Kane ka wan hadien ba ka All India Football Federation (AIFF) ka la pynbna ïa ka thup kyrteng ki ‘rangïalehkai ha ka sngi Palei.
Kane ka jingpynbna ka la pynkut noh ïa ki jingsaphriang ki khubor hamsaïa ha kaba ïadei bad ka kynhun ka ban ïashim bynta ha ka Asian Games namar dangshen kiba bun ki klob jong ka Indian Super League (ISL) ki la kyntait war ban pyllait ïa ki ‘rangïalehkai ban leit ïashim bynta sha katei ka lympung.
Kane ka lympung kan sdang naduh 19 tarik mynta u bnai, katba ka lympung ïalehkai ISL kan sdang hadien ar sngi.
Ha kaba ïadei bad ka phutbol ka ban ïashim bynta ha ka Asian Games la shah tang da ki ’rangïalehkai kiba hapoh 23 snem ka rta, hynrei la ailad lai ngut ki ‘rangïalehkai kiba la palat snem ba kin ïashim bynta lang. Kham hashwa ka kyrteng u Sandesh Jhingan, Gurpreet Singh Sandhu bad u Chhetri ki la paw kum ki lai ngut ki ‘rangïalehkai ba la san (senior), hynrei mynta sa tang u Chhetri u ban don lang bad kane ka kynhun. Kane ka mut ba ka Bengaluru FC kan duh ïa utei u kapten ha ka jingïakhun kaba nyngkong pyrshah ïa ka Kerala Blasters.
Kane ka long ka sien kaba nyngkong eh ïa utei u ‘rangïalehkai barim ka Shillong Lajong FC ban mihkhmat ïa ka ri India ha katei ka lympung.
Na ka liang u President ka AIFF u Kalyan Chaubey u la ong, “Ka long ka por kaba eh bha na ka bynta ka aïom ïalehkai phutbol. Ngi la don ha ka por kaba khim bha bad kam long kaba suk ban wanrah ïa ka kynhun kaba biang.”
“Kine ki wan jia ha kajuh ka por ha kaba ka lympung ïalehkai hapoh ka ri lem bad ka lympung ïalehkai bar ri ha kaba ka ïatyngkhuh lang hapdeng ka lympung ISL bad ka kynhun jong ka ri. Ka kynhun ïalehkai jong kiba la san (senior) ka dang shu dep ïalehkai katto katne ki jingïakhun, hynrei mynta ngi la dang pynkhreh sa ka Asian Games, hadien yn bud sa ka Merdeka Cup, World Cup Qualifiers bad ka AFC Asian Cup.”
Ka kyrteng ki rangïalehkai ka ri ki long u Gurmeet Singh, Dheeraj Singh Moirangthem, Sumit Rathi, Narender Gahlot, Deepak Tangri, Amarjit Singh Kiyam, Samuel James Lyngdoh Kynshi, Rahul KP, Abdul Rabeeh Anju-kandan, Ayush Dev Chhe -tri, Bryce Miranda, Azfar Noorani, Rahim Ali, Vincy Bareto, Sunil Chhe -tri, Rohit Danu, Gurkirat Singh bad u Aniket Jadhav.
