Shillong, Nailur 20
Ka Organising Committee ka la rai ban khang haduh lai kynta ïa ka surok na Laitsohpliah shaduh Mawsmai na ka bynta ka 2nd Sohra International Half Marathon ka ban long ha ka 30 tarik mynta u bnai.
Kane ka komiti ka la shong jingïalang ha ka sngi Ba-ar ha Conference Hall kaba ha Secretariat ha kaba ïa ka jingïalang la pynïaid da u Bah John F Kharshiing, Co-Chairman jong katei ka komiti na ka bynta ban bishar bniah ïa ka jingpynkhreh jong katei ka marathon kaba 21 km.
Ha katei ka jingïalang la ïakren sani bha halor ki jingdonkam bapher bapher na ka bynta ban pynlong ia ka 2nd Sohra International Half Marathon kaba jop namar kumba ka long ha u snem ba la dep ka la long kaba seisoh.
Ha katei ka jingïalang la ïadon lang ruh u Bah Sylvester Nong-tnger, Superintendent of Police, East Khasi Hills District, Dr P.N Chyne, Joint Director ka Health Services (SS), Kong J.M Umdor, Asst Commissioner ka Sohra Civil Sub-Division, Bah P.B War Nongbri, Assistant Director ka tnat Sports and Youth Affairs bad u Bah Finely L Pariat, Organising Secretary ka Sohra Run bad uba long ruh u General Secretary ka MSOA nalor kiwei pat.
Ha katei ka jingïalang la pynpaw halor ka jingtiud ki nongïashim bynta kiba la dep ban pynrung kyrteng ialade lyngba ka online kiba la don kumba 3000, katba ha u snem ba la lah ki la don tang 300 ngut.
Nalor katei ka jingïakop mareh kaba 21K, kin don ruh ki jingïakop mareh kum ka 10K, 5K. Ka jingkhang ïa ka surok naduh na Laitsohpliah shaduh Maw-smai, Sohra kan long naduh ka por 7 haduh 9 baje mynstep ha ka 30 tarik.
La pynpaw ruh ha katei ka jingïalang ba ïa kane ka marathon yn pynïaid kat kum ki jingpruid dak da ka Athletic Federation of India bad ka World Athletics. Na ka liang ki dkhot ka AFI kin wan poi ha kane ka nongbah ha kaba kut jong ka taïew.
