Kyiv, Nailur:
Ki bor pyniaid ka Ukraine, kiba na ka thaiñ Shatei lam mihngi jong ka Kupiansk ha Ukraine, ki la iathuh ba 6 ngut ki riew paidbah ki la khlad na ka jingshah thombor ha ki shipai ka Russia ha katei ka shnong.
Katei ka jingkhlad thymmai jong ki briew ha Kupiansk, ka la nang kyntiew ia ka jingdon jong kiba khlad baroh sha ka 9 ngut baroh.
Kumjuh ruh la ong ba katei ka jingshah thombor ka thaiñ Northeast jong ka nongbah Kharkiv ha khappud jong ka Ukraine bad Russia, ka long ruh hadien ba ka Russia ka la phah da ki drone ban leit thombor ha ka miet ba la lah, ha kaba iwei i la khlad ha katei ka miet.
Kitei ki 6 ngut kiba khlad, ki kynthup ia 4 ngut ki shynrang bad 2 ngut ki kynthei kiba dei hi na katei ka shnong Kupiansk.
La ong ba ki shipai ka Russia ki la ioh ban knieh ia katto katne ki bynta jong ka nongbah Kharkiv naduh ba sdang ka thma ha u Rymphang jong u snem 2022, hynrei ki shipai ka Ukraine ki la lah ban iada bad pynher krad biang ia ki shipai ka Russia na katei ka thaiñ dang ha kine ki khyndiat por ba la leit.
Kumjuh ruh ha kawei pat ka shnong kaba don sha bynta South jong ka nongbah Kherson, uwei u pulit ul a khlad noh hadien ba kawei ka bos kaba don hajan jong u, ka la shah siat, ha kaba 2 ngut kiba shong ha katei ka bos ruh ki la mynsaw bad ngat lang ha katei ka jingshah siat.
Uwei na kitei kiba shah siat bad mynsaw, u dei u tymmen 57 snem bad tang hadien kumba katto- katne por hi ba u la mynsaw jur bad ba la pynkit ia u sha jaka sumar naka bynta k jingsumar, u la khlad noh khlem da ioh shuh ban ai ia ki jingsumar kiba dei.
U Lat ka Lviv na ka phang West, kumba 1,000 Kilometre lane kumba 600 Miles na khappud bad ka Poland, dang shen u dang dep pynbna ba uwei u briew u la duh noh la ka jingim ha ka jingleit thombor ki drone ka Russia ha ka por shiteng miet.
Shuh shuh ruh la ong ba ia 7 tylli kitei ki drone ba la phah da ka Russia ha katei ka miet, la ioh ban siat pynbthei noh. Hynrei katei ka iing kaba don hapoh ka nongbah Lviv ka la dep shah thombor hashwa ba yn ioh siat ia kitei ki drone bad kumta la ong ba ka ding kaba heh ka la klang ha katei ka ïingmala ha katei ka miet.
Ia ka met jong utei u rangbah 32 snem la ioh tam na ka kamra ba la pluh bad ingkhong ha katei hi ka jaka ba la shah siat pynbthei ha kitei ki drone. Katba ia utei u samla 26 snem pat ki dang ioh ban pynkit sha jaka sumar naka bynta ban ioh sumar bniah.
Ki shipai Ukraine ki la iathuh ruh ba ha katei ka miet, ki la ioh ban siat pynhap noh ia kumba 27 na ka 30 tylli ki drone ‘Shahed’ ba la pynmih da ka Iran bad kiba la pyndonkam da ka Russia ha kane ka thma.
