Washington, Naitung:
U President ka United States, u Donald Trump, ha kane ka sien u la kren pynrem ïa ka Iran, ha kaba, u la ong ba ka tnat ïada jong ka Iran ka la khyllem bad u la kren beiñ ruh ïa u nongialam ba thymmai ka Iran- u Mojtaba Khamenei, da kaba ong ba ka mynsiem jong utei u nongialam ka la dep iap lypa kumba 90%. U Trump u la kren ïa kane, hadien ba la iohi ba u Mojtaba um shym la poi sha ka sngi pyndep burom ïa ka met jong u kpa jong u, uba long u nongialam barim ka Iran- u Ayatollah Ali Khamenei, kaba la long ha ka taiew ba la dep.
U Trump u la kren beiñ ruh bad ong ba ka tnat ïada jong ka Iran kam don shipai um, ne shipai suiñ, namar mynta baroh ki la khyllem lut. Wat ki liengsuiñ ba khlaiñ bor jongki ruh ki la julor lut bad baroh ki nongialam ba hakhlieh jongki, ki la dep iap lut.
U Trump u la kynnoh shuh shuh ba ki nongialam ba tbit tam jong ka Iran ki la shah pyniap ha katei ka thma. “Ki la jah noh. U Khomeini u la jah noh”, la ong u president, da kaba pyndonkam ïa ka kyrteng jong u nongialam sengbhalang ba la khlad noh jong ka Iran, uba la khlad noh ha u snem 1989, katba kumba ka paw, u thew ïa U Ali Khamenei, uba la shah pyniap ha ka sngi nyngkong jong ka thma, ha ka 28tarik u Rymphang.
U Mojtaba Khamenei, um shym la iohi paidbah satia naduh ka 28 tarik u Rymphang, ha kaba u la ngat bad mynsaw ha ki jingleit hiar thma jong ka US bad ka Israel kiba la pyniap ruh ïa u kpa jong u. Ka jingbym don jong u kaba dang iai bteng ka la pynmih ïa ka jingkynthoh paidbah kaba jur bha shaphang ka koit ka khiah bad ka jaka sah jong u.
