Dhaka, Naitung:
Kumba 51ngut ki briew ki la iap bad palat shi million ngut ki la shah ktah na ka jingjur jong u slap ha Bangladesh ha kine ki sngi ba ladep.
Da ki hajar ngut ki la duh noh ïa la ki ïing ki sem namar ka jingshlei um bad ka jingtwa khyndew ka la jia ha ki bynta kiba heh jong ka ri, kynthup ïa ka nongbah Dhaka.
Palat shiteng na kiba ïap haduh mynta ki dei ha Cox’s Bazar, kaba dei ka jaka sah jong ki nongphetwir Rohingya kiba bun bha. Ha ka taiew ba la dep katto katne ngut ki khynnah skul bad uwei u nonghikai ki la ïap ha katei ka distrik haba ka umsaw ka la rong noh ïa ka skul jong ki.
Ka Bangladesh ka dei ka ri kaba rit bad kaba don shibun ki wah, bad bunsien ka iohi ïa u slap uba jur bad ka jingshlei um ha ka aiom monsoon jong ka kaba man la u snem. Hynrei ki riew shemphang kin maham ba ka jingkylla ka suinbneng ka la pynlong ïa u slap ban kham jur bad kham bunsien.
U slap uba jur u la sdang palat shi taiew mynshwa bad katba u nang jur ha kine ki sngi ba la dep, ki bor synshar ki la pynmih ïa ki jingmaham shaphang ka jingshlei um bad ka jingtwa khyndew, ki la pynkynriah ïa ki longïing ha ki jaka ba don jingma, bad ki la pynkynriah noh ïa ki eksamin jong ki samla pule.
Da ki hajar ngut ki briew mynta ki sah ha ki jaka rieh tngen jong ka sorkar.
Haduh ka Sngi U Blei, ki don palat 1 million ngut ki briew kiba la shah ktah ha u slap, ong ki bor pyniaid.
Na ki 51 ngut kiba la ïap haduh mynta, ki don 28ngut ha Cox’s Bazar. Kane ka distrik ka dei kaba sah palat shi million ngut ki Rohingya kiba pynlong ïa ka jaka sah jong ki nongphetwir kaba heh tam ha ka pyrthei.
Ha Dhaka, ka jingdheng kali, ka la kham suki ha ka nongbah, namar ba ki nongshong shnong, ki iathuh ba ki surok, ki la shlei um, ha kaba ka um, ka la kiew haduh kjat ha ki katto katne ki jaka, ong ka khubor na Bangla.
Katto katne ki lad pathai khubor jong ka thaiñ ha ka Sngi Nyngkong ki la buh jingkylli ïa ki jingpyrshang jong ka sorkar mynshwa ban pynbeit ïa ki nala um ha Dhaka.
U Sarder Udoy Raihan uba na ka Flood Forecasting and Warning Centre u la ïathuh ha ka tnat pathai khubor ba ka jinglong jingman ha ka thaiñ shatei lam mih ngi jong ka Ri ka lah ban kham bha shen.
Hynrei da ka jingbteng jong u slap ban ktah ïa ki bynta ba shatei lam mihngi bad shathie jong ka Bangladesh, “ka don ka jingma ban nang jur shuh shuh ka jingshlei um”, u la maham.
