Washington, Naitung:
Ki nongthaw aiñ jong ka US, ki la pynpaw ïa ka rukom pynthymmai jong ka aiñ pynjari kyndon ïa ka Russia, ka aiñ ba don arliang mamla, kaba la wanrah nyngkong eh da u Senator Republican ba la khlad noh, u Lindsey Graham bad u Richard Blumenthal, uba la pynsuk ïa ka jingtyrwa tynrai jong ka dor 500% na ka bynta ki ri kiba wanrah ïa ka bor ding na Russia, kynthup ïa ka India bad China. Katei ka sienjam, lada pyntreikam, kan ai bor mynta ïa u President jong ka US, U Donald Trump, ban hiar thma ïa ki ri, da kaba buh dor haduh 100%.
Kane ka bill ka thmu ban pynjari ïa ki kyndon aiñ ïa ki heh sorkar jong ka Russia bad ban pyndonkam ïa ki khajna ban pynbor ïa ka China bad ka India ba kin pynduna ïa ka jingshaniah jong ki ha ka Russia kum ka nongsam bor ding. Ki nongthaw aiñ jong ka US ki ngeit ba ki jingpynjari kyndon kin pynjur ïa ka jingeh ha ka liang ka ioh ka kot ïa ka Moscow ban pynkut noh ïa ka jinghiar thma jong ka ïa ka Ukraine.
kaba la neh saw snem, kaba la pynïap ïa kumba 2 million ngut ki shipai bad pynjot ïa ka Kyiv da ka jingjulor kaba la kot sha ka $200 billion.
Ka China, India, Slovakia, Hungary, bad Azerbaijan ki dei ki 5 tylli ki ri kiba thied ïa u dewbilat na Russia, katba ka China, France, Japan, Hungary, bad Belgium ki dei ki ri kiba wan rah ïa ka umphniang na Russia. Lada u Trump un pynjari ïa ki khajna, kata ruh kan byrngem ban pynkhih ïa ka jingïadei khaii pateng jong ka US bad ka China bad ka India kaba la sniew lypa.
Ka rukom thymmai jong kane ka bill ka pynduna ïa ka dor kaba lah ban buh ha ki nongthied ba lai jong ka umphniang bad ka umphniang mariang jong ka Russia sha ka 100 percent kaba heh tam na ka bynta ki phra ngut ki nongthied ba hakhmat eh, kaba hiar na ka jingtyrwa ba mynshuwa kaba long 500%.
Ka rukom ba la pynthymmai ka ailad ruh ban pynlait na ka bynta ki ri kiba wanrah duna ïa ka 15 percent jong ka lyer ba shalan shabar jong ka Russia bad ki dang shim ïa ki sienjam kiba kongsan ban pynduna ïa kita ki jingshalan, kaba lah ban pynlait ïa ka Japan, France, Hungary, bad Belgium.
Kane ka sienjam ka pynjari ruh ïa ki jingpynjari ïa ki lieng kit mar jong ka Russia ki bym shaniah ha ki jingshakri ha duriaw jong ki ri Sepngi, ïa ki jaka ai pisa jong ka Russia, kynthup ïa ka Central Bank jong ka Ri Russia, bad ïa ki projek bor ding ba heh tam jong ka Russia, kynthup ïa ka Yamal LNG bad ka Arctic LNG 1, 2 bad 3.
Nalor kata, ka rukom thymmai ka kynthup ïa ka kyndon kaba ailad ïa u Trump ban weng noh ïa ki jingpynjari lada u shim ba ka long ha ka jingmyntoi jong ka ri U.S. ban leh kumta .
