Shillong, Nailur 20
Ka Tura District Cricket Associa-tion ka la pynliem noh ïa ka South Garo Hills DCA da 16 run hashwa ban shah pynthut noh ha u slap ha ka lympung ïalehkai U-19 Boys Inter District Cricket ba la pynïaid da ka Meghalaya Cricket Association ha ka sngi Balang.
Ha kawei pat ka jingïalehkai la hap ban pynsangeh noh hadien ba ka Ri-Bhoi DCA ka la sdang ban ïalehkai bha pyrshah ïa ka East Jaiñtia Hills DCA.
Ha kane ka jingïakhun, ka Tura kaba la jop ïa kynting pisa ha ka Zone 2 kaba la long ha Salpara, Mendipathar, hynrei ka la lah ban kamai 107 run bad shah pynkyllem 9 wiket ha ki 35.1 over. U Salchang Sangma bad u Silgar M. Sangma ki la khur mar 3/22 bad u Ayush M Sangma u la ïoh 2/11, na ka bynta ban khanglad ïa ka TDCA ban kamai kham bun. Ki san ngut kiba la tied kham hashwa ki la shah pynkhyllem noh ha ka por ba ka Tura ka la kamai 30/5. U Shahin Alone (21) bad u Darnell Sangma (11) ki la lah ban ïatied lang 43 run na ka bynta ki 6 wiket. Ïa kiwei pat ki 15 run la wan lyngba u Agatchu Chetai K. Marak na ka bynta ban pynurlong ïa ka TDCA ban kynjoh sha ki 100, hynrei u la shah pynkhyllem noh.
Ki nongkawang bol ka Tura kiba kynthup ïa u Denikcheng Marak (2/18) bad u Fernando Barbaryo M Sangma (2/12) ki la lah ban ïakhun tyngeh ïa ki nongtied ka liang pyrshah ha kaba ka la pynlong ïa ka SGH ban kamai tang 42/5 ha ki 13.3 over. Kat kum ka DLS method, ka SGH ka la dei ban kamai 59 ha katei ka por, te kumta ka Tura ka la jop da 16 run.
Haba phai sha kawei pat ka jingïakhun ha ka Zone 1 jong ka Group-A kaba la long ha Umbuda, Nongpoh, ka Ri-Bhoi ka la lah ban ïalehkai bha na ka bynta ban kamai 184/8 ha ki 28 over. Hynrei na ka daw ka jingshah pynthud ha u slap ym shym la lah shuh ban bteng biang ïa ka jingïalehkai.
U Banialam Mylliemngap u la long u nongtied uba la ïoh bun ha kaba u la ïoh ban khyrwit 34 run bad khlem shah pynkhyllem na ki 18 bol (4x4s, 2x6s). Katba u Dev Rai (3/29) bad u Jeffre Chyrmang (3/34) ki la lah ban pynhap wiket na ka bynta ka EJH.
Ka jingïalehkai ha ka sngi Palei ha ka Zone 1 (Group-B), ka East Khasi Hills Cricket Association kan ïakhun pyrshah ïa ka West Jaiñtia Hills DCA. Katba ha ka Zone 2, ka North Garo Hills DCA kan ïakhun pyrshah ïa ka Tura.
