Shillong, Nailur 21
Ka kynhun ki ‘thei ïalehkai phutbol U-17 jong ka Saiden Secondary School ka la nang jan ban jam sha ka quarter final ha ka lympung ïalehkai 63rd National Level Subroto Cup 2023, hadien ba ka bteng ïa ka jingjop kaba ar ha nongbah Delhi.
Kane ka la wan urlong hadien ba ka lah ban pynliem sa ïa ka Kendriya Vidyalaya Sangathan (KVS) da 4-0 kol ha ka sngi Thohdieng ha Tejas Football Ground kaba ha nongbah Delhi.
Ka Imaïa Shylla ka la thep ar kol, katba ïa ki shi kol la thep da ka Daïamon Makroh bad ka Eiladki Ksoo na ka bynta ban pynlong ïa ka Saiden ban bat ïa ka kyrdan ba hakhlieh jong ka Pool-G da kaba kamai 6 point na ki ar sien ïakhun.
Hadien ba ka la lah ban pynliem noh ïa ka kynhun kaba na Goa da 2-0 kol ha ka sngi Balang, kane ka kynhun ïalehkai kaba la mihkhmat ïa ka Jylla ha katei ka kyrdan, ka la ïakhun tyngeh naduh kaba sdang ha kaba ka la ïoh ban pynkhih jar nyng-kong eh lyngba ka Daïamon ha ka minit kaba 17.
Hadien katto katne por kane ka kynhun hapoh ka jingïalam u Bah Sumarlang Swer (coach) ka la ïoh thep ïa ka kol ba ar lyngba ka Imaïa ha ka minit kaba 22. Kane ka ‘thei ïalehkai shakhmat ka la pynbud biang ïa ka kol ba ar ha ka mint kaba 30 na ka bynta ban pynlong ïa ka Saiden ban tam da 3-0 kol haduh kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet, ka Saiden ka la thep biang ïa ka kol kaba saw lyngba ka Eiladki ha ka minit kaba 52. Wat la ka KVS ka la pyrshang ban ïakhun tyngeh, hynrei kam shym la lah ban pynphai bad ka la mad ïa ka jingshah rem kaba nyngkong namar kane ka kynhun ka la jop da 4-0 kol ïa ka Uttarakhand ha ka jingïakhun kaba nyngkong ha ka sngi Balang.
Kumba ka paw ka Uttarakhand ka dangdei ka kynhun kaba dangïai sah ha ka kyrdan ba shatrai ha kane ka Pool-G bad khlem pat kamai point namar hynne ka sngi ka la shah rem sa ha ka Goa da 3-0 kol.
Te kumta ka Saiden ka donkam ban jop lane ban shu pynïakhaid ha ka jingïakhun kaba lai bad kaba khatduh jong kane ka Pool pyrshah ïa ka Uttarakhand ha ka sngi Thohdieng ha ka por 7 baje mynstep ha kajuh ka madan khnang ban jam sha ka quarter final.
