Chennai, Nailur:
U Myntri Rangbah jong ka Tamil Nadu u MK Stalin u la pylllait paidbah ïa ka Kalaignar Women Entitlement Scheme ha ka 15 tarik, Nailur, kaba long ka jingïarap pisa kaba man u bnai da T. 1,000 sha ki longkmie kiba dei ki khlieh jong ki longïing ha ka jylla. Ïa kane ka skhim ba la tip kum ka “Kalaignar Magalir Urimai Thittam,” (Kalaignar Scheme for Right of Women) la pyllait paidbah na Kancheepuram, kaba dei ka shnong jong u nongseng jong ka seng DMK u CN Annadurai.
Ka sorkar Tamil Nadu ka la ong T. 7,000 klur la mang na ka bynta ka skhim jong une u snem. “Ym don mano mano ruh ki ban lah ban ai jingkheiñ ha kaba ïadei bad ka jingtrei jong ki longkmie ha ki ïing jong ki. Kane ka skhim ka don jingthmu ha ka ban pdiang ïa ki jingtrei jong ki. Kawei pat ka thong ba la thmu ban pyntreikam ka long ban ai jingïarap da kumba T. 12,000 shi snem ha kaba kan sa lah ban ïarap ïa ki ban ïeng hala kijong ki kjat bad ban rat noh ïa ka jingduk bad ban kyntiew ïa ka rukom im jong ki. Kine ki dei ki ar tylli ki bynta jong ka skhim hapoh ka rukom pyntreikam jong ka jingsynshar ki Dravidian”, la ong u Stalin.
