Shillong, Naiwieng 03
Ki dkhot ka Voice of the People Party (VPP) ha ka Sngi Thohdieng ki la ïakynduh ïa u Director ka North Eastern Indira Gandhi Regional Institute of Health and Medical Sciences (NEIGRIHMS), Prof. (Dr.) Nalin Mehta halor ka rta ba ïadei bad ka jingthung kam ïa ki Nursing Officer hapoh katei ka jaka pule/sumar.
Katkum ka jingpynbna ka NEIGRIHMS, ka rta ba la buh na bynta kitei ki kam la pynhiar na ka 35 sha ka 30 snem.
U General Secretary ka VPP, Dr. Ricky A.J. Syngkon haba kren sha ki lad pathai khubor hadien ka jingïakynduh bad u Director u la ong ba lada pynhiar ïa ka rta, kata kan long ka jingduhnong kaba khraw na bynta ki kyrtong ka Jylla.
U Dr. Syngkon u la ïathuh ruh ba ka jingthmu ban ïakynduh ïa u Director ka long ban tip ïa ka daw balei la pynhiar ïa ka rta na ka 35 sha ka 30 snem na bynta kitei ki kam.
Na ka liang u General Secretary u la ong ba u Prof. (Dr.) Mehta u la ïathuh ba katkum ka hukum na ka tnad ka koit ka khiah ka Sorkar Pdeng ba la pynmih ha ka 23 tarik Nailar, 2023 la pynhiar ïa ka rta na ka 35 sha ka 30 snem na bynta baroh ki jaka pule hapoh ka Sorkar Pdeng.
“Ngi sngew ba kane kan ktah ïa ki kyrtong jong ka Thaiñ Shatei Lam Mihngi bad kiwei-kiwei ki jaka lum bad ngi hap ban shim khia ïa kane bad ka Sorkar Pdeng,” ong u Dr. Syngkon.
U la ong ruh ba ka seng kan sa khmih bniah ba balei la pynmih ïa katei ka jingpynbna, shi sngi ha shuwa ba katei ka jaka pule ka la pyllait ïa ka jingpynbna na bynta kitei ki kam.
Ka seng kan sa ïakynduh ruh ïa ka Sorkar Jylla halor katei ka bynta khnang ban lah kyntiew biang ïa ka rta na ka 30 sha ka 35 snem na bynta kito kiba thep kam.
Kumban shu kdew hangne, ka AIIMS, New Delhi, katkum ka Notice No. 146/2023 – 05.08.2023, ka khot aplikeshon lyngba ka NORCET-5 na bynta ka jingthung kam ‘Nursing Officer’ na bynta ka AIIMS, New Delhi bad kiwei-kiwei ki AIIMS katkum ka jinglait kam ha kitei ki jaka pule.
Ïa ki eksamin la pynlong ha 17 tarik Nailur, 2023 {Online (CBT), Stage I: NORCET Preliminary} bad 7 tarik Risaw, 2023 {Online (CBT), Stage II: NORCET Mains}.
Ka AIIMS, New Delhi kynsan-kynsan lyngba ka shithi (No 200/2023) kaba la buh ha ‘website’ ha ka 25 tarik Nailar, ka la pyntip ba kum ka jingbteng ïa ka Notice No. 146/2023, ka NEIGRIHMS, Shillong mynta ka la long ka jaka pule ka ban ïashim bynta jong ka NORCET-5 bad ka tarik khatduh ban phah ïa ki phom (online) la pynjlan sha ka 28 tarik Nailar, 2023.
