New Delhi, Naiwieng 03
U MDC ka Sohïong, Bah Sherbor L Mawlong haba ai jingïaroh ïa ka seng Hynñiewtrep Achik National Movement (HANM) kaba la shim syndon ka lynti ban pynlong jingïakhih ha nongbah Delhi, u la pynpaw ka jingbynñiaw ba shaei pat kiwei ki seng ki don ban kit lang ïa ka lyngkor ka jaidbynriew.
U Bah Sherbor haba ai jingkren ha ka jingïalang ïakhih jong ka HANM ba la pynlong ha ka Sngi Thohdieng ha Jantar Mantar, New Delhi u la ong, “Ki seng ki don da ki phew phew tylli, hynrei kaba sngewsih ka long ba dei tang ka HANM kaba shim ïa ka jingkitkhlieh. Ngin ïakhih ha ban da jop, ngin ym tieng ne smiej ïa ki lathi jong ki shipai ne pulit lada phi ki paidbah phi shah kem, ai ba u Bah Sher yn shah kem nyngkong na ka bynta ka bit ka biang jong ki longdien mandien”.
U la ong, ba da ka mynsiem kaba shitrhem u la wan ban ïashim bynta lang ha kane ka jingïakhih ha nongbah Delhi bad ym kwah ba kane ka jingïakhih kan shu kut tang ha Shillong, bad lada ka mynsiem jong phi ka pang, jong ngi ruh kum ki nongmihkhmat ka pang bha ban ïohi ïa ki jingeh kaba ngi angnud ban pynurlong.
Katba u MDC ka Rambrai, Bah Bajop Pyngrope haba ai ka jingïaroh ïa ka seng HANM kaba la shim syndon da ka lynti ban pynlong jingïakhih ha nongbah Delhi, u la ong ba kine ki mat kiba la rah da ka seng ki long shisha kiba donkam bad kongsan tam na ka bynta ka jaidbynriew jong ka jylla Meghalaya.
U la ong, ba ka long kaba kongsan ban pynrung noh ïa ka ktien Khasi bad ka Garo ha ka Khyrnit ba Phra namar kan ai jingmyntoi ïa ka jaidbynriew Khasi bad Garo namar lada ki samla ki leit ban ïaleh ïa ki eksam kiba heh kum ka IAS, IRS, IPS bad kiwei kiwei kin ïoh ban thoh noh ha la ka jong ka ktien tynrai ka ban long ka jingmyntoi bad ka jaidbynriew kan lah ban sei ïa ki heh ophisar.
“Ki IAS kiba don ha Secretariat ki dei na kiwei pat ki jaidbynriew, namar ba ki jaidbynriew Khasi bad Garo haduh mynta ki hap ban leit thoh ïa ka IAS eksam da ka ktien phareng ka bym dei ka ktien jong ki kmie ki kpa jong ngi. Lada ïoh ïa ka jingithuh jong ka ktien Khasi bad Garo ha ka Khyrnit ba Phra kin sa mih bun ki IAS napoh ka jylla jong ngi ban pynbit pynbiang ïa jylla baieid ka jong ngi” la ong u Bah Bajop.
Ha kaba ïadei bad u pud u sam, u Bah Bajop u la ong ba ka Meghalaya ka la ïoh ïa ka jylla mynta la 50 snem hynrei kam don satia ïa u pud u sam ba pura haduh mynta bad ka long kaba donkam ban pynbeit noh ïa u pud u sam.
