Shillong, Naiwieng 03
Ka Joint Action Committee jong ka North Eastern Hill University (JAC-NEHU) ha ka Sngi Thohdieng ka la dawa na u Vice-Chancellor (VC), Prof. P.S. Shukla ban pynphai lut ïa baroh ka pisa kaba la siew tulop sha u Technical Officer/Senior Consultant, u Rohit Prasad halor ka jingkynnoh pyndonkam bakla ïa ka pisa jong ka skulbah.
U Shongknor ka JAC, Prof. Lakhon Kma haba kren sha ki lad pathai khubor hadien ka jingïalang General Assembly u la ong ba ka komiti ka la shim ïa ka rai ban dawa weng noh mardor ïa u Prasad uba la shah thung khlem da bud ryntih ïa ki aiñ thung kam ka NEHU.
U la ong ruh ba lada u VC u kwah ban ïakren bad ka komiti un hap pyni shuwa ïa ka shithi ba la weng ïa utei u briew na ka kam ba u trei.
“Ka pisa kaba u VC u la siew tulop ïa u Prasad (T.75, 040), nalor 38% ka DA lem bad ka jaka sah – ïa kane ka tulop, u VC u dei ban siew na ka pla jong u namar ka dei ka pisa ka NEHU bad u la pyndonkam bakla ïa ka,” ong u Prof. Kma.
U la ïathuh ruh ba ka JAC kaba la long kawei ka kynhun ba kynthup ïa lai tylli ki seng – NEHUSU, NEHUTA bad NEHUNSA, mynta kan ïakhun beit kum kawei ka kynhun, bad ka la kynthup lang (ha ka) ïa ki jingdawa bad jingai por jong baroh lai tylli ki seng.
“Ha ka 13 tarik mynta u bnai, kan sdang ka jingïakhih kaba jur. Da kawei ka sur ngi la rai ba ngi kum ka JAC ngin ngan pynjur shuh-shuh ïa ka jingïakhih ha kaba lehse kan sa poi ka por ban dawa phah mih syndon ïa u (VC),” ong u Shongknor.
Haba kdew ba u VC um i don mon ban pynbeit ïa katei ka jingeh, u la ai nuksa ïa ka ‘Emergent Academic Council’ kaba la dei ban khot naduh u bnai Nailar, hynrei tang namar ka jingpynslem (kaba lai bnai) na ka liang u VC, ka la pynthut lut ïa ka pule-puthi jong ki samla. Hynrei hadien ba la khot ïa ka, tang hapoh shiteng kynta, la dep rai bad pynbeit ïa ka jingeh.
“Kumjuh, ka jingweng ïa u Rohit ruh ka long kaba suk…ïa u briew phi la thung khlem aiñ, jingshisha hapoh shiteng kynta phi la lah ban weng hynrei um kwah ban weng…um kwah pynpaw ba u la bakla. Ngi tip ba um don lad shuh da kumwei, hynrei um weng, namar lada u weng, kan paw ba u la bakla bad um kwah ban kubur ïa kata namar la jur palat ka jingsngewmeng,” ong u Prof. Kma.
Utei u nongïalam u la kynnoh ruh ba u VC u la weng lut ïa ka jingthoh jong ka NEHU Act, Statues, Ordinance, Rules bad Regulation napoh ka ‘website’ jong ka NEHU.
Shuh shuh haba pynsngew ba ka la dei por ban thoh noh sha ka President ka India halor ki jingpynkheiñ kyndon u Prof. Shukla, u la bynrap, “Ngin sa ai ka kaiphod kaba bniah kumno u pynkheiñ ïa ki aiñ ha ka thung kam thung jam bad ka rukom pynïaid ïa ki kam kum u VC hapoh skulbah. Ngin phah kopi ruh sha u Lat ka Jylla bad ngin batai kumno une u VC u pyndonkam bakla ïa ka bor. Ngin pynkhreh noh ha ka Lah Sngi U Blei ban phah noh sha ka President kumjuh sha u Lat ka jylla.”
