Shillong, Naiwieng 03
Ka Anti-Ragging Committee jong ka North-Eastern Hill University (NEHU) ka la lum ïa ka jingïalang ba donkam ha ka 3 tarik Naiwieng ban ïakren halor ka jingjia ba dang shen kaba la jia ha Tura Campus.
Ïa katei ka jingïalang la pynïaid da u Vice-Chancellor uba dei ruh u Shongknor ka komiti.
Ka komiti ka la shim khia ruh halor katto-katne ki sienjam bad ki jingwad jingtip haba ïadei bad katei ka jingjia.
Kine ki kynthup ïa ka jingpynsngew u Shongknor halor ki jingïalang bad ki rangbah nongïalam Naga lem bad ki kynhun seng, kumjuh ka jingthaw jong ka skulbah ïa ka Inquiry Committee ban tohkit halor katei ka jingjia.
Ka Inquiry Committee ka la aiti ïa ka kaiphod, hynrei haduh mynta, ym pat shym la don kano-kano ka jingseisoh ha ka ban pynithuh ïa kiba donkti ha katei ka kam.
Ha katei ka jingïalang, u Prof. R. L. Nongkhlaw, Dean of Students’ Welfare, u la pynsngew sha ka komiti halor ki jingpyrshang ka skulbah ban kynjoh sha u lanot lyngba ki bahaïing hasem jong u, hynrei kaba sngewsih ka long ba ki bahaïing ki la pynpaw ïa ka jingbym treh ban shah ïa ka NEHU ban ïakynduh bad u halor katei ka bynta.
Ha kajuh ka por, u Dr. P. Khongji, Proctor, u la pynbiang ïa ki jingtip halor ka jingleit jngoh ka komiti ïa ka Tura Campus bad ïasam ruh ïa ki jingtip haba ïadei bad ki jingtohkit kiba dang ïaid jong ki samla pule kumjuh u Warden ba la pynlong da ka kynhun pulit ha Tura.
Nalor kane, u Dean of Students’ Welfare u la pyntip sha ka komiti ba u la ïakren halor ka jingpynkynriah ïa ka samoi pule jong u lanot sha kawei pat, kaba ka skulbah ka long kaba kloi ban ïarap. Hynrei na ka liang u lanot u la pynpaw ba um kwah ban ïaid shakhmat bad kano-kano ka jingpule ha kane ka samoi pule.
Haba ïadei bad ka jinglong-jingman, ka komiti ka la rai ban thoh sha u Director-General of Police (DGP), Chief Secretary, bad Superintendent of Police (Tura), bad kyrpad ïa ki ban pynsted ïa ka jingtohkit, da kaba ban jur ba ka jingslem ha ka jingartatien ka ktah shi kat dei ïa ka jinglong-jingman ka pule-puthi ha ka skulbah.
Ka komiti ka la rai ruh ban phah shithi sha u Campus Director ka Tura Campus, kaba kdew ba lada ym lah ban pynithuh kloi ïa kiba donkti, ka skulbah ka donkam ban pyrkhat ïa ki lad jingpynbeit ba kyllum katkum ki ‘Clause’ hapoh ka University Grants Commission (UGC).
Ha kajuh ka por, la rai ba ki nongpeit Hostel lem bad kiwei-kiwei ki ophisar kin hap pynbiang ïa ka kaiphod kaba bniah kaba batai ïa kino-kino ki jingdkoh haba ïadei bad ka jingslem ban ujor ejahar halor katei ka jingjia.
Na ka liang ka komiti ka la tyrwa ruh ban thaw ïa ka komiti jong 4 ngut ki dkhot kaba kynthup ïa ki dkhot ba nabar ban pynlong ïa ka jingtohkit kaba bniah halor katei ka jingjia.
Shuh shuh ka skulbah kan wad lad ban kyrpad ïa ki rangbah nongïalam Naga ban ïarap ha ka ban ïakren bad u lanot, ha ryngkat ka jingmynjur jong u, khnang ban ïoh pynithuh ïa kiba donkti ha katei ka jingjia.
Ka komiti ka la rai ruh ban lum biang ïa ka jingïalang hadien 2 taïew ban khmih bniah halor ka jinglong-jingman jong katei ka jingjia.
Nalor kane, ka skulbah ka kyrpad ïa kino-kino kiba don jingtip haba ïadei bad katei ka jingjia ban wan shakhmat ban ïarap ïa ka jingtohkit.
