Shillong, Naiwieng 05
Ka North East Students’ Organisation (NESO) ha ka 9 tarik mynta u bnai kan pynlong ïa ka jingïakhih ha baroh ki nongbah jong ki Jylla ka Thaiñ Shatei Lam Mihngi kum ka jingpyrshah halor ka jingbym larkam ka Sorkar Pdeng ban pynbeit ïa ka jingïakynad ha Manipur kaba la neh mynta la hynriew bnai.
“Ka NESO ha ka jingïalang Executive Council kaba la long ha ka 31 tarik Risaw, 2023 ha Guwahati ka la pynbeit ban pynlong da ka jingïakhih ha baroh ki nongbah jong ki Jylla ka Thaiñ Shatei Lam Mih-ngi ha ka 9 tarik mynta u bnai,” la ong ka kyrwoh na ki nongïalam ka seng.
Ka jingthmu jong katei ka jingïakhih ka long ban pynpaw ïa ka jingbitar pyrshah ïa ka jingbym larkam ka Sorkar Pdeng ban pynbeit ïa ka jingïakynad kaba la neh la hynriew bnai ha Mani-pur.
Ha kajuh ka por, ka NESO ka dawa ba ka Sorkar India kam dei ban bteng ïa ka jingleh matlah jong ka, hynrei ban wad ki lad ki lynti kumno ban pynbeit noh kloi ïa katei ka mat da kaba buh jingmut ïa ki jingsngew bad jingai jingmut jong kiba bun balang halor katei ka bynta.
Haba pynpaw ka jingsngewkhia halor ka jinglong-jingman kaba dang ïai bteng mynta ha Manipur, ka kynhun ka la ong, “La ïaid la hynriew bnai, hynrei ka jinglong-jingman kam pat wanphai sha kano-kano ka jingpyni dak jong ka jingjai-jai bad ïa kane lah ban kdew kti ïa ka jingbym larkam na ka liang ka Sorkar India ban pynbeit ïa katei ka kam ha ka rukom kaba ïaid beit ïaid ryntih, ha kawei ka liang kaba buh jingma ïa ka jingim bad ki jingdon-jingem jong ki briew khamtam ka lawei jong ki samla pule.”
Kum ban shu kdew hangne, ha ka 3 tarik Jymmang mynta u snem, ka jingïakynad jaidbynriew kaba jur ka la wan jia ha ka Jylla Manipur ha kaba da ki spah ngut ki briew ki la ïap, mynsaw bad da ki phew hajar ngut ki la kylla long phetwir.
