Shillong, Naiwieng 05
U MLA ka liang pyrshah jong ka Voice of the People Party (VPP), Bah Brightstarwell Marbaniang u la ong ba um shym la shah khot sha ka jingïalang jong ka tnad Public Health Engi-neering (PHE) ban khmih bniah ïa ka jingpyntreikam jong ka skhim Jal Jeevan Mission (JJM) ha Mawlai konstitwensi.
U la ong ba ka jingïalang hapoh ka jingpynïaid u Myntri ka tnad PHE, u Marcuise Marak ka kynthup ïa ki Rangbah Shnong jong ka Nong-kwar, Umthlong, Maw-ïong Umjapung, Maw-ïong Rim lem bad u MDC, Bah Teiborlang Pathaw.
“Kane ka long ka bym sngewtynnad namar ma nga kum u MLA ngam shym la shah khot,” la ong u Bah Marbaniang.
U la ong ruh ba un sa phah da ka shithi ujor sha u Myntri ka tnad PHE halor katei ka bynta.
Ha kajuh ka por, u la ong ba dang shen ka la don ka jingpynbna na ka Sorkar Jylla kaba kdew ba kino-kino ki skhim la ki dei jong ka Sorkar Jylla ne Sorkar Pdeng ba la pyntreikam ha kano-kano ka konstitwensi, yn ym lah ban ïaid lait na u MLA ka thaiñ.
Na ka liang une u nongmihkhmat u la ong ruh ba ka jingïalang ba dang shen kaba la khot da ka tnad PHE ka long pyrshah ïa ka jingpynbna jong ka Sorkar Jylla.
U Bah Marbaniang u la ïathuh ba ka kyrwoh haba ïadei bad ka jingpyntrei ïa ka skhim JJM ha Nongkwar Block-13, Mawïong Umjapung, Mawïong Rim kaba kdew ba ka kam ka la don ha ka kylla khatduh ne ka la ïaid 100 na ka 100 wat hadien jong ka jingïalang ba la khot da ka tnad PHE, ka long kaba ïalam bakla.
U la ong ba u la leit jurip ïa kitei ki jaka bad u don ruh ïa ki kot ki sla ki ban pynshisha ba ka jingtyllun jong ka kam ha kiba bun ki bynta ka long tang 5%, 0%, 20% bad kumta ter-ter.
“Nga sngew ba kane ka jingleh jong u Myntri ka tnad PHE – kane nga ïohi ba imat ki pyrshang ban leh politik wat ïa ka skhim kaba dei jong u paidbah da kaba ïaid lait na nga,” la ong u MLA ka Mawlai haba kren sha ki lad pathai khubor.
Shuh shuh u Bah Marbaniang u la bynrap ba ha ka jingshisha la dei ban khot lang ïa u sha ka jingïalang namar ha kaba sdang dei ma u uba la rah ïa ka mat ban pyntreikam ïa ka skhim JJM hapoh Mawlai konstitwensi.
“Nga la rah ïa kane ka mat namar nga sngew ba ki paidbah nong Mawlai kim dei ban duhnong ïa ka skhim JJM,” u la ong.
Shuh shuh u la bynrap ba kum u MLA, um dei ban shah ïaid lait haba pyntreikam ïa ki kam pynroi jong ka Sorkar Jylla ne Sorkar Pdeng hapoh konstitwensi.
