Shillong, Naiwieng 05
Hadien ba la dep ban pynlong ïa ka jingïakhih shong kyllaiñ mungor ha Jantar Mantar, New Delhi ha ka 3 tarik mynta u bnai, mynta ki nongïalam jong ka Hynñiewtrep Achik National Movement (HANM) ki la pynkhreh ban leit ïakynduh ïa ki heh ophisar jong ka Ministry of Home Affairs (MHA) ban ïakren halor ki 3 tylli ki mat jingdawa ba ki la pynpaw ha ka jingïakhih.
Katkum ka jingïathuh jong u President ka HANM u Bah Lamphrang Kharbani u la ong ba hadien ba la dep ban pynlong jingïakhih ha nongbah Delhi, na ka liang ki heh ophisar ka Ministry of Home Affairs ki la khot ïakren ïa ki nongïalam ka seng ban ïakren halor ki mat ba ka seng ka la rah.
Kumba ka long mynta, ki lai tylli ki mat ba ka seng ka la rah ha ka jingïakhih ba la pynlong dang shen ha nongbah Delhi ki long ban pyntreikam noh ïa ka Inner Line Permit (ILP), ban pyrung ïa ka ktien Khasi bad Garo ha ka Khyrnit ba Phra jong ka riti synshar ka ri bad ban pynbeit noh ïa u pud u sam hapdeng ka jylla Meghalaya bad Assam.
U Bah Lamphrang u la ong ba kane ka jingïakynduh ka lah ban long ha ka 8 ne 9 tarik mynta u bnai bad ba la bthah ïa ka seng ba kin wan tang 6 ngut ba kynthup ïa u President ban ïoh ïakren halor kitei ki mat jingdawa.
Lah ban pynkynmaw ba ka jingïakhih ba dang shen jong ka HANM kaba la pynlong ha Jantar Mantar ha Delhi ka la long kaba ïaid beit. Ha kane ka jingïakhih, la wan ruh ban synran bad ai jingkren da ki ar ngut ki MDC ba kynthup ïa u Bah Bajop Pyngrope, MDC ka Rambrai bad u Bah Sherbor L Mawlong, MDC ka Sohïong kiba la mihkhmat na ka bynta ka Khasi Hills Autonomous District Council lem bad ka seng Jaiñtia National Council.
