Tel Aviv (Israel), Naiwieng 05
Ki shipai ka Israel ki la pyntip ba ka jingleit tur sha Gaza Strip ha ka Sngi U Blei ka la pynpait arliang ïa kane ka jaka bad ka jingthombor pyrshah ïa ki dkhot ka kynhun Hamas ka dang ïai bteng haduh mynta.
“Ki shipai Israel ki la ïoh ban kerkut ïa ka Gaza City. Mynta ka don ka Gaza ba Shathie bad ka Gaza ba Shatei,” la ong u nongaiktien ki shipai Israel, u Daniel Hagari.
Ha kawei pat ka liang, u Myntri Rangbahduh ka Israel, u Benjamin Netanyahu, mynta ka sngi u la kyntait ïa ki jingkyrpad ban don noh da ka jingsangeh ïasiat ha Gaza lada ka Hamas kam pat pyllait im ïa palat 240 ngut ki briew kiba ka la rahbor ha ka 7 tarik Risaw.
“Kan ym don satia ka jingsangeh ïasiat lada ym pat pyllait lut ïa baroh ki briew kiba la shah rahbor,” la ong u Netanyahu ha Ramon Air Force Base ha ki bynta ba shathie jong ka Israel.
“Ngi pynbna ïa kane sha ki paralok bad ki nongshun jong ki. Ngin bteng haduh ba ngin da lah ban pynliem ïa ki. Ngim don lad da kumwei pat,” u la ong.
Ki Myntri ka tnat bar ri jong ka Qatar, Saudi, Egypt, Jordan bad ka United Arab Emirates ki la ïakynduh ïa u Secretary of State ka US, u Antony Blinken, ha nongbah Amman, Jordan ha ka Sngi Saitjaiñ bad ki la kyntu ïa u ban pynsngew sha ka Israel ban kohnguh ba kan don noh da ka jingsangeh ïasiat.
Na ka liang u President ka Palestine, u Mahmoud Abbas, u la dawa ba ka dei ban don noh da ka jingsangeh ïasiat kaba mardor ha ka por ba u la ïakynduh ïa u Blinken ha West Bank.
Hynrei na ka liang u Blinken u la kyntait ïa ki jingkyntu jong kiba bun ban don da ka jingsangeh ïasiat. U la ong ba ka jingsangeh ïasiat kan ailad ïa ki dkhot ka Hamas ban ïalum biang.
Ka tnat ka koit ka khiah ha Gaza ha ka Sngi U Blei ka la pyntip ba palat 9,770 ngut ki nong Palestine ki la shah pynïap naduh ba sdang ka thma hapdeng ka Israel bad ka Hamas ha ka 7 tarik Risaw. Ki la don ruh 1,400 ngut ki nong Israel kiba la shah pynïap ha ki dkhot ka Hamas.
