Jowai, Naiwieng 05
Ki nongshet ja sngi ha ki skul bapher-bapher jong ka Jylla kiba don hapoh ka shatri jong ka Union of Cook cum Helpers PM POSHAN Megha-laya (UCCHPM Poshan) ki la weng noh ïa ka jingsangeh shet ja sngi bad kin sdang ban leit shet ja ha ki skul bapher-bapher naduh 7 tarik Naiwieng.
Kane ka jingsangeh shet ja sngi ha ki skul bapher-bapher ka la sdang naduh ka 16 tarik Risaw namarba ka Sorkar kam siew ïa ka bainong jong ki kaba sah naduh u bnai Naitung ter-ter mynta u snem.
Ïa ka rai weng sangeh treikam, la shim ha ka jingïalang General Meeting kaba 4 kaba la long ha u Lumtiniang, Mowtyrshiah, West Jaiñtia Hills Districts ha ka 3 tarik Naiwieng.
Ka Kong Banalis Syiem, President ka seng, Meghalaya, Shillong ka la pynbna ïa ka rai jong ka CEC bad ba ka seng kan sdang ban leit shet ja biang sha skul naduh ka 07/11/23. Ka la ong ruh ba ïa katei ka rai la shim hadien ba ka Sorkar Jylla ka la siew ïa ka pisa ‘honorarium’ kaba tang Ar hajar tyngka shi bnai haduh u bnai Nailur 2023.
Ka la ong ba ka seng ka kyntu ïa ka Sorkar Jylla ba kan siew lut ïa ka bai bylla kynthup jong u Risaw bad Naiwieng ha shuwa ka Khristmas.
Kumjuh, ban lait na ka jingpyndonkam da ki dieng, u rnga bad kaba la ktah jur ïa ka koit ka khiah ki nongshet ja, ka la ong ba ka Sorkar ka dei ban hukum naduh u bnai Ïaïong 2024 ba dei ban pyntreikam da ka LPG ha man ki kamra shet ja ha skul ha baroh ka Jylla khnang ba ka jingïalap jingthung dieng kan long kaba don nongrim ban pynneh-pynsah ïa ka mariang.
Ïa ka jingïalang la pynïaid da ka Chairperson ka Kong Phiioris Syngkon, President Laskeiñ Block bad la ïoh ka jingkren pdiang na ka Kong Lamjingieid Lapasam, General Secretary Laskeiñ Block ha ka jingdonlang u Bah O.B. Kurbah, Senior In-charge Consultant, u Bah Asoo Suchiangm PM Poshan, u Bah K.L. Pariat Adviser AJMDMWU, u Waheh Shnong, Mowtyrshiah, u Bah Satellite Lapasam bad ki spah ngut ki nongshet.
U kongsan u Bah O.B. Kurbah ha ka jingkren u la ong ba na ka liang ka ophis jong u kan ïaleh katba lah ban pynkloi ïa ki kam kiba ïadei bad ki nongshet ja sngi bad ban pynbeit ïa ka rukom pynïaid ïa ka PM Poshan ha Meghalaya.
U la pynkynmaw ïa ki nongshet ja sngi ba ka bam ka dei ban long kaba khuid bad u la ïaroh ruh ïa ka seng ki nongshet ja sngi kaba kloi ban ïatreilang bad ka Sorkar. Nalor kata, u la ong ka PM Poshan lane ka ‘Mid-Day Meal’ ka dei ka skhim kaba bsa ïa ki longïing bad pyllait na ka jingïap thngan bad ban pynïoh ïa ka jingbam kaba tei ïa ki khynnah.
Ha kaba ïadei bad ki nongshet ja sngi, u la ong ba ki dei ki rishot jong ka PM Poshan bad lyngba jong ki, ka skhim PM Poshan ha Meghalaya ruh ka la ïaid shakhmat.
Ha kane ka jingïalang, u Bah Jerry Anderson Suting u la pynsngew ïa ka kaiphod treikam jong ka seng naduh u snem 2021 haduh u snem 2022. Katba ïa ka kaiphod ‘Audit’ la pynsngew da ka Secretary, Kong Joycifull Lypon.
Ha kane ka sngi la jied ruh ïa ki nongshet ja sngi ka AJMDMWU. Ki nongkitkam bathymmai ki long u President – Jerry Anderson Suting, Vice President – Biiola Ïakai, General Secretary – Joycifull Lypon, Assistant Secretary – Arkini Lytan, Treasurer – Rimika Chalam.
