Shillong, Naiwieng 05
Ka tnad Biochemistry jong ka North Eastern Indira Gandhi Regional Institute of Health and Medical Sciences (NEIGRIHMS), Shillong, ka la pynlong ïa ka Pre-Conference CME (ACCLMPCON 2024) halor ka phang, “Breaking Barriers: Advancement in Alzheimer’s Disease” ha ka 4 tarik mynta u bnai da ka jingthmu pynsngewthuh sha kito ba ïadon bynta ha ki kam sumar haba ïadei bad ka jingdon jong u CSF (based biomarker) jong ka jingpang ‘Alzheimer’ u ban ïarap ha ka ban lap kloi ïa ka jingpang ‘Alzheimer’ ha shuwa ban paw ki dak ki shin.
Ïa katei ka CME la plie ha ryngkat ka jingdonlang u kongsan, Prof. (Dr.) Nalin Mehta, Director ka NEIGRIHMS Shillong. Kiwei-kiwei kiba la don lang ki kynthup ïa u Prof. (Dr.) Suvomoy Chakraborty, Dean (Academic) In-charge, bad Prof. (Dr.) C. Daniala, MS, NEIGRIHMS, Shillong.
Ka Prof. (Dr.) Alice A. Ruram, HoD, Biochemistry, ka la ai ïa ka jingkren pdiang bad kren halor ka bynta jong ki ‘Biomarker’ ha ka ban lap ïa ka jingpang ‘Alzheimer’.
Na ka liang u Prof. (Dr.) Suvomoy Chakraborty u la ai khublei ïa ka tnad Biochemistry halor kane ka sienjam.
U Prof. (Dr.) C. Daniala u la kdew ïa ka bynta jong ka ‘Radiology’ bad ki ‘Biomarker’ ha ka ban lap ïa ka jingpang ‘Alzheimer’.
U Prof. (Dr.) Nalin Mehta u la ban jur halor ka jingdonkam na bynta ban lap kloi ïa ka jingpang bad ka lad jingsumar ïa ka ‘Dementia’ bad ka ‘Alzheimer’ naba ïa kine la lap ba ki kham jur ha kiba la heh ka rta.
Shuh shuh u la ai jingmut ba ki doktor ba dang khynnah ki dei ban don ka jingtip kaba bniah halor ka ‘Dementia’ khnang ba ki lah ban batai ïa ki nongpang na bynta ka jingsumar kaba biang.
Ki ‘Delegate’ bad ‘Resource Person’ na ki bynta bapher-bapher jong ka ri kumjuh na ki bynta bapher-bapher jong ka tnad sumar ki la ïashim bynta ha ka jingïalang bad ïasam ïa ka jingtip jong ki haba ïadei bad kitei ki jingpang.
