Shillong, Naiwieng 05
Ka Medulance, kaba dei ka kompani kaba pynbiang ïa ki Emergency Service, ka la pynkhreh ban pynkylla ïa ka jingpynbiang ïa ki lad Emergency Service ha Meghalaya.
Kumba ka long mynta, katei ka kompani ka la pynkhreh ban pynbiang da ki kali kit nongpang lane Ambulance kiba la pyndait da ki kor ki bor 5G. Kane ka long ka sien banyngkong ha ka thaiñ Shatei Lam Mihngi ba kaba kum kane ka lad kan wan. Ka Medulance ka don ka thong ban pynduna ïa ka por ba ki Ambulance ki wan kit ïa ki nongpang ban pynpoi sha ki Hospital.
Hadien ba ka la don ha kane ka thaiñ mynta la lai snem, da kaba ïatreilang bad ki Public Sector Undertaking (PSU), ka Medulance ka don ka jingïadei kaba jan bad ki paidbah ka Meghalaya, la ong u kyrwoh khubor. La ong ba kumba ka long mynta, ka Medulance ka don jingthmu ban pynïar ïa ka jingtreikam jong ka ha Meghalaya. Haduh mynta, ka Medulance ka trei lyngba ka EDNA Enterprise kaba la ïarap ïa ka sorkar jylla ban pynïaid ïa ki kali kit nongpang hadien ba ka GVK EMRI ka la iehnoh.
Na ka liang ka Medulance ka la dep ban phah ïa ka jingtyrwa sha ka sorkar na ka bynta ban pynïaid ïa ki kali kit nongpang ha kaba yn pyndait da ki kor ki bor ki ban ïarap ïa baroh kiba ïadon bynta ha kane ka kam.
“Ka thong jong ka Medulance ka long ban pyntreikam da ki Ambulance ba la pyndait da ki kor ki bor 5G ha baroh kawei ka jylla kham kloi katba lah. Kane kan kham pynbha ïa ka jingshakri ïa ki paidbah kiba donkam ïa ki lad jingïarap. Ïa mynta, ngi thmu ban pynlong ïa ka Meghalaya ka jylla kaba nyngkong ka ban don ïa ki Emergency Service kiba ïaid da ki kor 5G,” la ong u Pranav Bajaj uba dei u Co-Founder, Medulance Healthcare.
Ka la don ruh ka jingpynkhreh na ka bynta ka Risk and Crisis Management, Call Flow of Emergency Medical Services (EMS), ban shim ïa ki nongtrei kiba la don lypa, bad ban pynthikna ba kan ym don ka jingthut ha ka jingtreikam. Kane ka kynthup ïa ka jingbuh ïa kiba bun ki shlem treikam, Generator, nongtrei bad ki Network Provider ban pynthikna ba ka jingtreikam kan ym thut ha kano-kano ka por.
Ha katei ka kyrwoh khubor, ka Medulance ka la pynpaw ba ka kwah ba ka kompani kaba biang tam kan shah jied na ka bynta ban pynïaid ïa ki Ambulance ha kane ka jylla.
Kumba ka long mynta, ka Medulance ka la pynïar ïa ka jingtreikam jong ka ha ki PSU kum ka NTPC, COAL India, bad Odisha Jail. Ha ka lympung jingïalang jong ka G20 ba dang shen, ka sorkar ka la shim jingïarap na ka Medulance ban pynbiang ïa ki jingdonkam ba kyrkieh jong kiba la wan ban ïashim bynta ha katei ka jingïalang.
Hynrei lah ban kdew hangne ba ki nongtrei ka 108 hapoh ka jylla ki la pynpaw ka jingsngewkhia naba ki lai tylli ki kompeni ba la jied da ka Sorkar ban shimti pynïaid ïa ka 108 Emergency Ambulance Services ki dei kiba la don dak sniew.
“Kawei na ki ka dei ka Medulance kaba la bna halor ka jingbym lah ban siew ïa ki nongtrei ha ka por jong ka COVID-19,” la ong u President ka kynhun, Bah Roypar Raswai, ha ka Sngi Saitjaiñ.
U la ong ruh ba ka Global Health Service kaba la ïasnohlang bad ka UKSSA kaba pynïaid ïa ka 108 bad 102 Emergency Service ha Delhi, ha u snem 2018, ka la don ka jingïakhih pyrshah ïa katei ka kompeni halor ka jingbym lah jong ka ban siew tulop sha ki nongtrei.
U Bah Raswai u la ïathuh ba ka UKSSA kam shym lah ban siew tulop ïa ki nongtrei naba ka Sorkar kam shym la pynbiang sha ki ïa ka jingïarap pisa kaba donkam namar ka rukom pynïaid katei ka kompeni kam ïahap katkum ki kyndon ba la ïateh bad ka Sorkar.
U la ong ruh ba ka kompeni kaba lai ba la jied da ka Sorkar – Ziqitza Health Care Ltd. ka don hapdeng ka jingtohkit da ka Central Bureau of Investigation (CBI) haba ïadei bad ka jingpynïaid kam jong ka ha Rajasthan.
