Shillong, Naiwieng 06
U nongwad RTI bapaw ka jylla, u Bah Disparsing Rani, u la ong ba katkum ka jubab ba u la ïohpdiang na ka tnad Social Welfare ha ka 6 tarik u Risaw 2023, la ong ba ki briew kiba dih drok kiba don hapoh ka nongbah Shillong ki don haduh 3,184 ki shynrang bad 32 ngut ki kynthei. Pynban kaba lyngngoh pat ka long kim ju don kita ki prokram ai jingpynshai paidbah ban kiar na ka jingdih ïa u drok katba ka pisa pat la pynlut thik-thik ha ka ban ai jingsumar bad pynbiang ïa ki jingdonkam na ka bynta kito kiba la ngat ha u drok.
Haba kren sha ki lad pathai khubor ha ka Lah Sngi U Blei ha Shillong Press Club, u la ong kaba sngewlyngngoh ka long ba kim ju don kita ki prokram ki ban ai jingpynshai bad jinghikai ban kiar na kaba dih ïa u drok katba ïa ka pisa pat la pynlut na ka bynta ki lai hajar tam ha ka ban sumar bad pynbiang ïa ki dawai ka la kot shaduh ka T. 9 klur 28 lak 90 hajar 556 spah. Kane ka la pynkyndit ïa ka jylla baroh kawei namar ba kane ka bui ka dei tang na ka bynta 13 snem naduh u snem 2010 haduh u snem 2023.
“Uta u dei u dak jingkylli uba eh bha haduh katta-katta ba tang na ka bynta ki nongdih kiba tang katta, ka pisa kaba la pynlut pat ka dei haduh katne”, la ong u Bah Disparsing.
U Bah Rani u la buh jingkylli ruh ïa ka sorkar da kaba ong ba lada tang lai hajar tam ki don kiba dih bad pyndonkam ïa u drok la pynlutphut haduh katne ka pisa, hynrei lehse lada ki don da ki lak ngut kiba dih ïa u drok ka mut ka pisa u paidbah baroh kan leit tang sha ka ban sumar ïa kiba dih drok.
U Bah Disparsing u la ong ba ha kaba ïadei bad ka jingpynlut jong ka sorkar haduh T. 9 klur tam, na ka liang ka jong u, un sa pan biang ïa ka jubab halor ba kumno ki la pynlut ïa katei ka pisa.
