Jowai, Naiwieng 06
Ha ka jingbym banse bad jingkutlad na ka jingbym ïoh tulop la 8 bnai kynthih, palat 500 ngut ki nongtrei jong ka Jaiñtia Hills Autonomous District Council (JHADC) ki la pynlong ïa ka jingïakhih da kaba shong kyllaiñ mungor kaba jar-jar ryngkat bad ki lama ïong kiba la sieh ha u pud u sam jong ka shlem treikam ka JHADC, Jowai ha ka Lah Sngi U Blei mynta ka taïew.
Ki nongtrei kiba don hapoh ka synjuk jong ka JHADC-Staff Association ki la shim ruh ïa ka rai ban pynlong da ka jingshong kyllaiñ mungor kaba lai sngi lynter hadien ba la kut ka Dorbar Tlang ne Winter Session jong ka JHADC ka ban sdang ha ka 9 tarik mynta u bnai.
Ha kane ka jingïakhih palat 500 ngut ki nongtrei ki la shim bynta ryngkat ka phong sopti ïong kum ka dak ban pynpaw ka jingsngewsih namar ka jingbym ïoh tulop.
Lah ban pynkynmaw ba ki nongtrei ka JHADC ha ka 4 tarik Risaw 2023 ruh ki la pynlong ka jingïakhih shong kyllaiñ mungor ban pynbor ïa ka sorkar ban siew ïa ka tulop jong ki, kaba sah naduh u bnai Nohprah mynshem snem.
U President ka JHADC-Staff Association, Bah Johnson Pohrmen haba kren sha ki lad pathai khubor u la ong, hadien ka jingïakhih jong ki kaba la long ha ka 4 tarik Risaw, ki nongtrei ki la ïoh pdiang noh ïa ka tulop kaba shibnai na bynta jong u bnai Kyllalyngkot (January) 2023 bad mynta kaba dang sah ka long sa phra bnai.
“Ngi dawa ïa ka sorkar ba kan siew noh ïa ka tulop jong ngi namar kumba long mynta ka la buh ïa ngi ha ka jingeh kaba khraw ban pynbiang ïa ka jingdonkam ka ïing ka sem artad ka aïom lehkmen Khristmas ruh ka lajan,” la ong u President.
Ha kaba ïadei bad ka jingduh tulop, u la ïathuh ba kane ka jingduh tulop jong ki nongtrei ka JHADC ka sdang naduh u snem 2019 haduh kine ki sngi, hynrei wat la ki duh tulop ruh ki nongtrei ki wan trei tista ban pyndep ïa ka kam bad ki kam ka ophis ruh ki long kiba ïaid beit ïaid ryntih khlem don jingthut eiei.
U la kyntu ruh ïa ki 7 ngut ki MLA bad MP ba kin phai khmat lem sha ki nongtrei ka JHADC.
