Shillong, Naiwieng 06
Wat la ka Lyngkyrdem-Laitkroh konstitwensi ka dei kaba la mihkhmat da u MDC ka UDP hynrei kum ka jingangnud ban ïakhun ïa ka ilekshon MDC ha u snem ban wan, la mih uwei u samla ban ïaknieh tiket na kane ka konstitwensi.
Katkum ka jingtip, u Bah Dmuising Khongjirem uba dei na ka shnong Wahkhen, uba dei u nongthoh khubor, u la pan tiket na ka UDP ban ïakhun ïa ka ilekshon MDC na katei ka konstitwensi.
Ha ka jingshisha, u Bah Ryngkatlang Lyndem u dei u MDC jong ka UDP na katei ka konstitwensi hadien ba u la jop ha u 2019.
Haba pyntikna halor kane, u Bah Dmuising u la kubur ba u la pan tiket na ka UDP ban ïakhun ïa ka ilekshon MDC bad kaba sah, kan shong ha ka rai jong ka seng. Haba kylli, kaei ka daw kaba pynlong ïa u ban pan tiket wat haba u don u MDC, u Bah Dmuising u la ong ba ha ka synshar paidbah bad ka UDP kaba bud ïa ka nongrim ka synshar paidbah, mano-mano ruh lah ban pan tiket kampher wat haba la don u MDC ne MLA bad ka shong ha ka seng ban bishar ban khan ban thew tarajur ïano ban ai tiket hadien ba la leh ïa ka jingwad jingtip na ki nongïalam, ki nongkyrshan jong ka konstitwensi.
“Hooid, nga la pan tiket hadien ba la ïasyllok bad kiba bun ki nongïalam ka seng. Ka shong mynta ha ka jingstad ki nongïalam, ïano i dei ban ai tiket,” u la ong bad bynrap, “Ka jingmih ban pan tiket wat haba la don u MDC, ka don ka daw bad la kyrmen skhem ba ki nongïalam ka seng kin bishar sani, ym ban shu shim ïa uba la don lypa hynrei ban sngap ïa ka sur kiba bun balang, ïoh ba kan pynsniew dur lada ïaleh pyrshah ïa ka mon u paidbah”.
Ha kajuh ka por, u la ong ba shwa ba un pan tiket, u la ïasyllok bad kiba bun ki nongïalam ka UDP jong ka Lyngkyrdem-Laitkroh konstitwensi, kiba la ai mynsiem ban ïaid shakhmat.
Lah ban kdew ba u Bah Dmuising u dei u President ka UDP Youth Wing Pynursla Circle.
Dang shen, ka NPP ka la rai ban pynïakhun da u pyrsa u Bah Prestone Tynsong u Bah Rahboklang Tynsong, da kaba pynshong noh ïa u MDC barim Bah Jansing Tynsong. Katkum ka jingtip ba la ïoh lum, ka Voice of the People Party (VPP), ka lah ban pynïakhun ïa u Bah Shemphang S Rynjah, katba kiwei ki seng kum ka Congress, ym pat tip ïano kin pynïakhun.
