Gaza, Naiwieng 06 (UNI)
Ka jingdon ki nongshong shnong ka Palestine ha Gaza kiba la shah pynïap naduh ba la sdang ka thma Israel-Hamas ka la kot sha palat 10,000 ngut ha ka Lah Sngi U Blei.
Ka tnat ka koit ka khiah ha Gaza Strip ka la ong ba ka jingïap jong ki briew na ka jingther jong ka Israel ka la kot sha ka 10,022 ngut. U nongaiktien jong kane ka tnat, u Ashraf al-Qidreh, u la ïathuh ba ki la don 292 ngut ki nong Palestine kiba la ïap naduh ka miet Sngi U Blei bad haduh ka Lah Sngi U Blei na ka jingther bom ka Israel.
La ong ruh ba kiba bun na kiba la shah pynïap naduh ba sdang ka thma ha Gaza ki dei ki ‘riew paidbah ba kynthup ïa palat 4,000 ngut ki khyllung khynnah.
Ka jingïakhun ha Gaza Strip ka dang ïai bteng haduh ka Lah Sngi U Blei, shi sngi shwa ba ka thma Israel-Hamas kan kot sha ka shi bnai kynthih ha ka Sngi Ba-Ar.
Ka thma hapdeng ka Israel-Hamas ka la sdang ha ka 7 tarik Risaw hadien ba ki lehnoh Hamas ki la leit thombor ïa ka Israel na Gaza Strip. Haduh mynta, palat 1,400 ngut ki nong Israel, kham bun ki dei ki ‘riew paidbah, ki la shah pynïap na ka jingthombor ka Hamas. Na ka liang ki lehnoh Hamas ki la rahbor ruh ïa palat 240 ngut ki ‘riew paidbah sha Gaza Strip. Ka Israel ka la pynhiar kput da kaba ther da ki bom na suiñ bad da kaba phah ïa ki shipai na ryngkew.
