Jowai, Naiwieng 06
Ka Seiñraij Jowai ka la plie paidbah ïa ka Khnap Thang-bru ïa kaba la khot kyrteng ka Kambel Shullai Eco-Friendly Crematorium kaba la shna ha Khliehriat Turiem kaba don ha ka shnong Khliehtyrshi, West Jaiñtia Hills District.
Ïa kane ka khnap thang-bru la wan plie da u MP ka Lok Sabha u Bah Vincent H Pala ha ka jingdonlang u Dolloi ka Elaka Jowai, u Bah Puramon Kynjing, u Waheh Shnong ka Khliehtyrshi u Bah Kitbok Rymbai, ki ‘riew rangbah ka Seiñraij Jowai bad ki bahaïing hasem ka Rina Challam kaba la ai sngewbha ïa ka jaka ban shna ïa kane ka Khnap Thang-bru.
Ïa ka jingïalang la pynïaid da u President ka Seiñraij Jowai u Bah Hercules Toi bad ïa ka nguh blei la pyndep da u Pator ka Elaka Jowai, u Bah Raymond Nartiang.
U Bah Vincent H Pala uba la ai jingïarap ban shna ïa kane ka Khnap Thang-bru, ha ka jingkren u la ïaroh ïa u Ma Kambell Shullai (bam kwai ha dwar u Blei) uba lap nyngkong eh ïa kane ka buit thang-briew kaba tip kum ka Khnap Thang-bru.
