Shillong, Naiwieng 06
Hadien ba la jop haduh saw sien kynthih ïa ka ilekshon MDC na Shella konstitwensi, u Bah Teiñwell Dkhar u la shim ïa ka rai ba un nym ïakhun shuh ïa ka ilekshon MDC ka ban wan.
U Bah Teiñwell uba la jop ïa ka ilekshon MDC na Shella haduh saw sien lynter, u la ïoh ruh ban bat ïa ka shuki Chief Executive Member, shuki Chairman bad ka shuki kum u nongïalam ka Liang Pyrshah hapoh ka Khasi Hills Autonomous District Council.
Kane ka jingshim rai jong u Bah Teiñwell Dkhar ban nym ïakhun shuh ïa ka ilekshon ka long halor ka jingbym don ha ka met ka phad kaba koit ba khiah bad kawei pat ka long ba u la kwah ban ailad noh ïa kiwei kiba dang samla.
“Nga la rai ban nym ïakhun shuh ïa ka ilekshon MDC bad ruh ban nym bat kam shuh ha ka seng UDP hynrei ngan dang bteng pat ban dang long kum u dkhot kane ka seng, kaba nga la don bynta naduh ka por jong u (L) Dr Donkupar Roy, uba la ïalam ïa ka seng bad long teng ruh u Myntri Rangbah ka jylla,” la ong u Bah Teiñwell bad bynrap “Ka jingrai kam dei ba nga la tymmen, hynrei nga dang don 60 snem ka rta bad haba peit lei lei, ki dang don kiba ha kane ka rta kiba mih shakhmat ban ïakhun ilekshon, hynrei nga rai namar ka jinglong ka koit ka khiah jong nga bad ruh ban ailad noh ïa kiwei.”
Ha kaba ïadei bad ka jingjied kyrtong pat na ka bynta ban ïakhun ha ka ilekshon MDC na Shella, u Bah Teiñwell u la ong ba yn sa shim ïa ka rai kaba khatduh da ka jingïatreilang hapdeng jong ka seng bad ki nongkyrshan ki jong ka.
