Shillong, Naiwieng 07
Ka seng United Democratic Party (UDP) bad ka Hill State People’s Democratic Party (HSPDP) kiba don hapoh ka lama jong ka Regional Democratic Alliance(RDA) ha ka Sngi Ba-ar ka la pynlong ïa ka jingïakynduh lang ban ïakren halor ka jingpynkhlaiñ ïa ka RDA bad ki katto- katne ki bynta kiba ïadei bad ka RDA.
Haba kren sha ki lad pathai khubor hadien ba la wai ka jingïalang jong ka RDA, u President ka United Democratic Party (UDP), Bah Metbah Lyngdoh, u la ong ba ha katei ka jingïalang ki la ïakren ha ka ban nang pynskhem shuh-shuh ïa ka RDA bad ban pyntikna ba ka RDA kan dang ïatreilang ban ïaid shakhmat ha kaba ïadei bad ki kam bad ki mat bapher-bapher kiba ïadei bad ka jylla.
“Mynta ka sngi ngi la shong ïa ka jingïalang da ka jingaibor jong baroh artylli ki seng ba ngin pynskhem shuh-shuh ïa ka RDA bad ha kajuh ka por ba ngin ïaid shakhmat ha kaba ïadei bad ki kam bad ki mat bapher-bapher na ka bynta ka jylla ka jong ngi”, la ong u Bah Metbah.
Shuh shuh ha katei ka jingïalang ki la jied ruh ïa ki nongkitkam jong ka RDA ha kaba u Chairman u dei u Bah Metbah Lyngdoh, u Co-Chairman u dei u Bah Martle N Mukhim, u Secretary u dei u Bah KP Pangniang bad u Assistant Secretary pat u dei u Bah Titosstarwell Chyne kiba kynthup ruh ïa ki 11 ngut ki dkhot ki ban thung da ka UDP bad ka HSPDP ha kaba 6 ngut kin dei na ka UDP bad 5 ngut na ka HSPDP.
Haba kylli ha kaba ïadei bad ka MP ilekshon, na ka liang u Bah Metbah u la ong ba ka RDA ka la ïakren shwa kumno ban pynkhlaiñ ïa ka RDA bad ban ïaid shakhmat ha kaba ïadei bad ki mat bad ki kam bapher-bapher jong ka jylla. Hynrei halor ka jingrai la hato ka UDP bad ka HSPDP kan pynïeng lang da ujuh u kyrtong, u Bah Metbah u la ong ba ïa kata yn sa rai bad ïakren sani bha hadien ki jingïalang ki ban sa wan.
“Na ka liang jong ngi ka RDA, mynta ka sngi ka jingïakren ka long kumno ban pynkhlaiñ ïa ka RDA bad ban ïaid shakhmat ha kaba ïadei bad ki mat, ki sobjek bad ki kam bapher-bapher kiba ïadei na ka bynta ka bha ka miat jong ka jylla, hynrei halor ka sobjek jong ka MP ilekshon lehse, ngin sa shim bynta ha ki jingïalang ki ban sa wan”, la kubur u Bah Metbah.
