Nongpoh, Naiwieng 07
Ka Khasi Students’ Union, North Khasi Hills District hapoh ka jingïalam u samla Banjop Maring ha ka Sngi Ba-ar ka la leit ban ïakynduh ïa ka District Medical & Health Officer (DMHO) jong ka Ri Bhoi District, ka Dr TS Momin ban ïakren halor shibun ki jingduna jong ka Mawlasnai PHC kaba la buh jingeh shikatdei ïa ki paidbah ka thaiñ kiba leit shah sumar ha katei ka jaka.
Ha kane ka sngi, ka seng ha ryngkat ka jingïadon lang ki dkhot na ka Eastern Border Area bad Raid Nongtung Circle ki la aiti ruh da ka dorkhas sha ka DMHO ban pynpaw ïa ki jingduna ha ka Mawlasnai PHC kiba kynthup naduh ka jingduna ki doktor bad nongtrei, ka jingbym biang jong ka um bad ka jingkhapngiah jong ka jaka shim dawai kiba ka sorkar ka dei ban shimkhia mardor.
U samla Banjop Maring haba kren sha ki lad pathai khubor hadien ka jingkynduh ïa ka DMHO u la ong, ka seng ka dap da ka jingsngewkhia halor ka jingbym biang katei ka jaka sumar ha Mawlasnai PHC kaba la buh jingeh ïa ki paidbah ka thaiñ.
U la ïathuh ruh kumba long mynta, don tang kawei ka doktor ha katei ka jaka ai jingsumar ha kaba na ka liang ka seng ka la dawa ba dei ban buh shuh ïa ki doktor kiba thikna ha katei ka jaka ai jingsumar. Sa kiwei de ki jingeh kiba ki paidbah ki mad ka dei ka jingbym biang jong ka um bad ka jingkhapngiah palat ka jaka shim dawai.
Shuh shuh u la ong ruh ba ka jingshimkhia jong ka seng halor kine ki mat ka dei hadien ba ka la ïoh ïa ka jingujor na ki paidbah ha kaba la dawa ba ka sorkar jylla ka dei ban shimkhia mardor ban pynbiang ïa ki jingduna katei ka PHC kiba la pyndkoh ïa ka rukom treikam bad ai jingsumar.
Ha kajuh ka por u la ong ba ka seng shen kan sa leit ban kynduh ruh ïa ka Myntri ba dei khmih ïa ka tnat ka koit ka khiah ka jylla, ka Kong Ampareen Lyngdoh ban kyrpad ban kyntiew kyrdan ïa katei ka PHC sha ka CHC namar kumba long mynta, ka jingbun jong ki paidbah kiba leit ban sumar ha katei ka jaka ki la nang bun bad kane ka la buh jingeh ruh wat ïa ki doktor bad nongtrei katei ka jaka ai jingsumar.
