Shillong, Naiwieng 07
Ha ka jingbteng ban talasi ïa ki kali bad thuk-thuk ba pyndait da ki ‘modified silencer’ ne ki ‘exhaust pipe’, ki pulit ka Shillong Traffic Police (STP) ki la ïoh ban bat haduh 119 tylli ki kali bad thuk-thuk kumjuh ban daiñ kuna T.5,000 kawei-pa-kawei.
Ha ka kyrwoh khubor ba la pyllait da u Superintendent of Police (City) East Khasi Hills u Bah Vivek Syiem la ong ba kine 119 tylli ki kali bad thuk-thuk ki dei kiba la ïoh bat naduh ka 1 tarik Risaw haduh ka 5 tarik Naiwieng 2023, ha kaba ïa kine kiba la ïoh bat la daiñ kuna ruh katkum ka kyndon 182-A4 jong ka Motor Vehicle Act.
Ha kawei pat ka liang, u Bah Vivek Syiem u la buh ka jingkyntu sha baroh ki nongñiah kali bad nongñiah thuk-thuk ba kin bujli noh ïa ki exhaust pipe ne ki modified silencer bad ban pyndait beit da kiba wan lang bad ki kali na ki kompeni namar ka jingteh khyllah da kiwei ka la pynwit shi katdei eh ym tang ïa ki nongïaid nongïeng hynrei kito kiba sah harud surok ruh kumjuh, kiba la kyllut na ki jingsawa jam kaba mih.
Nalor kane, la bthah ruh ïa ki nongñiah kali ba kim dei ban tah ïit ïong ha ki kali, teh ïa ki light pynthaba bad ki siren ha ki kali bad pyntip ruh ba ka jingtalasi kali kan dang ïai bteng bad yn pynshitom da kaba tyngeh ïa kito kiba pynkheiñ aiñ.
