Shillong, Naiwieng 07
U Chief Executive Member (CEM) ka Khasi Hills Autonomous Dis-trict Council (KHADC), Bah Pynïaid Sing Syiem ha ka Sngi Ba-ar u la hiar hi da lade ban leit khynra naphang ïa ki dukan jong ki bar jylla kiba khaïi hapoh ka ïew Majai.
Kane ka jinghiar jurip jong u CEM, ka la long hadien ba ki la don haduh 44 tylli ki dukan jong ki bar jylla kiba la leit ban tied ïa ka jingkhang jong ka ïingbishar namar ka jingbym ïoh ïa ka laisen khaïi na ka KHADC.
Ha kane ka sngi, u CEM ba la synran lang da u EM ka tnat Khajna ka KHADC u Bah Fantin J Lakadong ryngkat ki ophisar ka tnat Enforcement Wing, ki la lap ba kiba bun ki dukan khamtam jong kito 44 ngut ki bar jylla, ki la khang khyrdep lypa shwa ban wan poi ki heh KHADC.
Ha kane ka jinghiar jurip bad khynra ïa ki dukan bar jylla, na ka liang u CEM u la ïoh ban ïakren bad pan ruh ïa ki kot ki sla ne ka laisen khaïi, ka labour license bad la lap ba kiba bun ki dukan kim biang satia, ha kaba la phah khang noh shwa.
Kaba kham sngew thamula ha kane ka jingkhynra laisen khaïi jong ka KHADC ïa ki dukan bar jylla ha ïew Majai, la lap ba uwei u bar jylla uba shong die dukan bad uba dei trai ïa ka dukan u la kylla long nongbylla hadien ba u la die noh ïa ka dukan kaba u shong ha u Khasi.
Kane ka la paw ha kane ka jingkhynra bad jurip ïa ki kot ki sla, ha kaba la wan mih uwei u trai shnong ban kam trai ïa ka dukan, da kaba ong ba ïa kane ka dukan la long trai da ma u bad une u bar jylla uba dei trai mynshwa u la kylla nongbylla ha katei ka dukan.
Haba kren sha ki lad pathai khubor hadien ba la dep ban jurip, u Bah Pynïaid u la ong ba ka jingkhang khyrdep ïa la ki dukan da ki bar jylla ha kane ka sngi, imat ka paw ba lah ban don eiei ne imat ba kim biang satia ïa ki kot ki sla.
“Nga la dep ban bthah ïa ki ophisar ba ïa ki dukan kiba la khang khyrdep ha kane ka sngi ba kin leit tah da ka jingthoh ne ‘notice’ na ka bynta ba kin wan mih sha KHADC ban leh ïa kaba donkam khnang ba kin ïoh ban plie biang,” la ong u CEM.
U Bah Pynïaid u la ong, ba ka District Council katkum ki kyndon aiñ ba la don kan nym lah satia ban ai ‘trading license’ ne laisen khaïi sha ki bar jylla, lada kim lah ban pynbiang ne ïoh na ka No Objection Certificate (NOC) na ka shnong, ki Raid ne Hima kaba ki don.
